శనివారం 04 ఏప్రిల్ 2020
Komarambheem - Feb 10, 2020 , 23:14:48

నులి పురుగుల నివారణతో సంపూర్ణ ఆరోగ్యం

నులి పురుగుల నివారణతో సంపూర్ణ ఆరోగ్యం

తిర్యాణి : నులి పురుగుల నిర్మూలనతో రక్తహీనత, ఆరోగ్య సమస్యలు దూరమై సంపూర్ణ ఆరోగ్యం లభిస్తుందని కలెక్టర్‌ సందీప్‌కుమార్‌ ఝా విద్యార్థులకు సూచించారు. మండల కేంద్రంలోని చెలిమెల బాలికల ఆశ్రమ పాఠశాలలో సోమవారం జాతీయ నులి పురుగుల నివారణ దినోత్సవం నిర్వహించారు. సంబంధిత అధికారులతో కలసి మాత్రల పంపిణీ కార్యక్రమాన్ని ప్రారంభించారు. ఈ సందర్భంగా ఆయన మాట్లాడారు. తెలంగాణ ప్రభుత్వం నులి పురుగులను రూపుమాపేందుకు బ్రహ్మాండమైన కార్యక్రమాన్ని ప్రవేశపెట్టిందన్నారు. జిల్లాలోని 19 ఏళ్లలోపు పిల్లలందరికీ మందులు వేయించడం జరుగుతుందన్నారు. నులి పురుగులు చాలా ప్రమాదకరమన్నారు. వీటివల్ల రక్తహీనత ఏర్పడి పిల్లల్లో శారీరక, మానసిక ఎదుగుదల కుంటుపడుతుందని పేర్కొన్నారు. ఆల్బెండజోల్‌ మాత్రలు వేసుకోవడం వల్ల పిల్లల్లో వ్యాధి నిరోదక శక్తి పెరగడంతో పాటు నులి పురుగులను నివారించవచ్చునన్నారు. ఈ మాత్రలు జిల్లా వ్యాప్తంగా అన్ని ప్రభుత్వ, ప్రైవేట్‌ పాఠశాలలు, అంగన్‌వాడీ సెంటర్లలో ఆయా పీహెచ్‌సీల్లో అందుబాటులో ఉంటాయన్నారు. కా ర్యక్రమాన్ని పకడ్బందీగా చేపట్టి, విజయవంతం చేయాలని జిల్లా, మండల వైద్యాధికారులు, సిబ్బందిని ఆదేశించారు. అనంతరం ఆశ్రమ పాఠశాలను సందర్శించారు. వంటగదులు, పరిసరాలను పరిశీలించారు. ఎప్పటికప్పుడు పరిశుభ్రంగా ఉండేలా చూడాలన్నారు. విద్యార్థుల వ్యక్తిగత పరిశుభ్రతపై దృష్టి పెట్టాలన్నారు. ఈ సందర్భంగా పలు సమస్యలను విద్యార్థులను అడిగి తెలుసుకున్నారు. ప్రణాళికాబద్ధంగా చదువుకొని వంద శాతం మార్కులు సాధించాలని పదోతరగతి విద్యార్థులకు సూచించారు. విద్యార్థులకు మంజూరైన ఆట వస్తులను పరిశీలించారు. కాగా, మొదటిసారిగా మండలాన్ని సందర్శించిన సందర్భంగా కలెక్టర్‌ను వైద్యఆరోగ్య శాఖ అధికారులు, సిబ్బంది శాలువాలతో సన్మానించారు. కార్యక్రమంలో అసిస్టెంట్‌ కలెక్టర్‌ ప్రశాంత్‌ జైన్‌, జిల్లా వైద్యఆరోగ్య శాఖ అధికారి కుమ్రం బాలు, ఆర్‌బీఎస్‌కే పీవో సునీల్‌రావు, తాసిల్దార్‌ మస్కూర్‌ అలీ, ఎంపీడీవో కుటుంబరావు, వైద్యాధికారులు శ్యాం, కౌటిల్య, హెచ్‌ఈవో రశీద్‌, ప్రధానోపాధ్యాయులు కొర్వేత పాండు, ఆయా శాఖల సిబ్బంది, విద్యార్థులు ఉన్నారు. 



logo