న్యూఢిల్లీ, మార్చి 25: ఎన్కౌంటర్ స్పెషలిస్టు అంటే పురుషులే గుర్తుకువస్తారు. కానీ ఢిల్లీ పోలీస్ విభాగానికి చెందిన ఎస్ఐ ప్రియాంక.. అధికార్లతో కలిసి నేరస్థులపై జరిగిన ఎన్కౌంటర్లో పాల్గొన్నారు. కరడుగట్టిన గ్యాంగ్స్టర్ రోహిత్ చౌదరి, అతని అనుచరుడు ప్రవీణ్ అలియాస్ టిటును ఎన్కౌంటర్ అనంతరం ఢిల్లీ పోలీసులు గురువారం అరెస్టు చేశారు. ఈ ఎన్కౌంటర్లో ప్రియాంక కూడా పాల్గొన్నారు. ఒక మహిళా ఎస్సై ఎన్కౌంటర్లో పాల్గొనడం ఢిల్లీ పోలీసు శాఖలో ఇదే ప్రథమం. గురువారం తెల్లవారుజామున ప్రగతి మైదాన్ ప్రాంతంలో నిందితులు జరిపిన కాల్పుల్లో ఎస్సై ప్రియాంకతో పాటు ఏసీపీ పంకజ్కు బుల్లెట్ ప్రూఫ్ జాకెట్లకు తూటాలు తగిలాయి. అయినా నిందితులను వదల్లేదు. నిందితులను కాళ్ల కింద భాగంలో కాల్చి, వెంటనే దవాఖానకు తరలించారు.