న్యూఢిల్లీ: లీటర్ పెట్రోల్ సెంచరీకి దగ్గరవుతున్న ఈ కాలంలో రూ.2కే ఇస్తున్నారంటే ఆశ్చర్యం కలగక మానదు. కానీ ఇది నిజం. ప్రపంచంలోని కొన్ని దేశాల్లో ఇప్పటికీ పెట్రోల్, డీజిల్ రేట్లు చాలా చాలా తక్కువ. మన దేశంలో ప్రభుత్వాల పన్నులన్నీ కలిసి అసలు పెట్రోల్ రేటు కంటే రెట్టింపవుతున్నాయి. కానీ కొన్ని దేశాల్లో ఇప్పటికీ మన కరెన్సీలో చూసుకుంటే లీటర్ పెట్రోల్ రూ.2 నుంచి రూ.10 వరకే ఉన్నాయంటే నమ్మశక్యం కాదు. ఆ దేశాలేంటి? అక్కడ రేట్లు ఎలా ఉన్నాయో ఇప్పుడు చూద్దాం.
వెనెజులాలో లీటర్ రూ.1.45 : ముడిచమురు సమృద్ధిగా దొరికే వెనుజులాలో పెట్రోలియం ఉత్పత్తుల ధర చాలా తక్కువ. www.globalpetrolprices.com ప్రకారం ఈ నెల 22వ తేదీన మన కరెన్సీలో రేటు చూస్తే అది కేవలం రూ.1.45 కావడం విశేషం.
ఇరాన్లో లీటర్ రూ.4.39 : వెనెజులా తర్వాత అత్యంత తక్కువ పెట్రోల్ ధరలు ఉన్నది ఇరాన్లో. ఇక్కడ లీటర్కు రూ.4.39 మాత్రమే. ఇరాన్ నుంచి ఇండియా భారీ స్థాయిలో ముడి చమురును దిగుమతి చేసుకుంటోంది.
ఇక రూ.30లోపు ధర ఉన్న దేశాలను చూస్తే.. అంగోలా (రూ.17.77), అల్జీరియా (రూ.25.03), కువైట్ (రూ.25.13), సూడాన్ (రూ.27.40), కజక్స్థాన్ (రూ.29.65), ఖతార్ (రూ.29.82) ఉన్నాయి.