అమ్మ అందరితో మాట్లాడుతుంటే గర్భంలోనే నేను ఎన్నెన్ని పదాలు
నా లేలేత నాల్కతో ఊ కొడుతూ నేర్చుకున్నానో అప్పుడే పండితుడనైనట్లు మరి!
అమ్మ పాడుతుంటే గర్భంలోనే నేను మెలకువగా మేలుగా ఎన్నెన్ని రాగాలు నేర్చానో
సంగీత విద్వాంసుడనైనట్లు మరి!
తల్లి కడుపులోనే తన్మయంగా నాకు మాతృభాషా అభ్యాసయోగం!
పుట్టినాక అమ్మ ఒడిలో
చెక్క పలక మీద అమ్మ సుద్ద ముక్కతో అఆలు దిద్దిస్తుంటే వింటూ అంటూ రాస్తూ
ఎంతెంత మహా ప్రాణంగా నేర్చుకున్నానో!
అమ్మ ఆనందంతో నా చెంపలపై
ఎన్నెన్ని ముద్దులను మహారాజ ముద్రలుగా చేసిందో ప్రశంసిస్తూ.. పెద్దబాల శిక్ష నేర్పుతూ
నన్ను పెద్దగా చేసింది ఆది గురువై!
ఎదుగుతున్నా కొద్ది నాకు తెలుగు భాషా
సౌందర్యం సాక్షాత్కరించింది..
నానా అర్థాలుగా కావ్యాలుగా కథలుగా!
గుండ్రటి ముత్యాల అక్షరాల
అజంతా విద్య నా తెలుగు మాతృభాష!
పరభాషలు ఎన్ని నేర్చుకున్నా
మాతృభాషే స్పందనలుగా హృదయం!
కందాళై రాఘవాచార్య
87905 93638