‘దేవుడి భూములు ఆక్రమిస్తే చర్యలు’

స్టేషన్‌ఘన్‌ఫూర్‌, జూన్‌ 08 : దేవుడి భూములను ఆక్రమిస్తే వారిపై కేసులు నమోదు చేస్తామని చిలుపూర్‌గుట్ట దేవస్థానం ఈవో బీ లక్ష్మీప్రసన్న హెచ్చరించారు. దేవాదాయశాఖ కమిషనర్‌ ఆదేశాల మేరకు సోమవారం మండలకేంద్రంలోని శ్రీ వేణుగోపాలస్వామి దేవాలయానికి సంబంధించిన 788, 789 సర్వేనంబర్‌లోని 3.20 ఎకరాల భూమిని ఆమె పరిశీలించారు. అనంతరం ఈవో మాట్లాడుతూ మండలకేంద్రంలో దేవాలయానికి సంబంధించిన కొంత భూమి అన్యాక్రాంతమైందని పైగామస్తులు ఇచ్చిన ఫిర్యాదు చేయగా స్థలాన్ని పరిశీలించినట్లు చెప్పారు. త్వరలో భూమిని రీసర్వే చేయిస్తామన్నారు. ఆక్రమించిన వారికి నోటీసులు ఇస్తామని తెలిపారు. ఆమె వెంట సర్పంచ్‌ ఉద్దెమారి రాజ్‌కుమార్‌, ఆలయ సిబ్బంది రమేశ్‌, ప్రధాన అర్చకుడు రవీందర్‌శర్మ ఉన్నారు.