ఘట్కేసర్ రూరల్, మే 9 : గుర్తు తెలియని మహిళ హత్యకు గురైన సంఘటన ఘట్కేసర్ పోలీస్ స్టేషన్ పరిధిలోని అన్నోజిగూడలో ఆలస్యంగా వెలుగు చూసింది. ఘట్కేసర్ ఇన్స్పెక్టర్ ఎన్.చంద్రబాబు కథనం ప్రకారం.. ఘట్కేసర్ పోలీస్ స్టేషన్ పరిధి అన్నోజిగూడలోని సర్వీసు రోడ్డులో ఉన్న ఓ భవనంపై గుర్తు తెలియని మహిళ మృతదేహం ఉన్నట్లు స్థానికులు ఘట్కేసర్ పోలీసులకు సమాచారం అందించారు. వెంటనే సంఘటనా స్థలికి చేరుకున్న పోలీసులు మృతదేహాన్ని పరిశీలించి ఆమె వయసు 30-40 సంవత్సరాలు ఉంటుందని తెలిపారు.
మహిళ ఒంటిపై దుస్తులు లేకపోవడంతో ఒక్కరే మహిళను ఇక్కడికి తీసుకువచ్చి అత్యాచారం చేసి హత్య చేసి ఉంటారని, మూడు నాలుగు రోజుల కిందట ఘటన జరిగి ఉండొచ్చని అనుమానం వ్యక్తం చేస్తున్నారు. మృతదేహం కుళ్లిపోయి ఉంది. కేసు నమోదు చేసుకున్న పోలీసులు మృతదేహాన్ని పోస్టుమార్టం నిమిత్తం దవాఖానకు తరలించారు.