బుధవారం 03 జూన్ 2020
Jagityal - Mar 31, 2020 , 02:55:09

మరింత కఠినంగా కర్ఫ్యూ

మరింత కఠినంగా కర్ఫ్యూ

కార్పొరేషన్‌, నమస్తే తెలంగాణ: రెడ్‌జోన్‌ పరిధిలోని ముకరంపుర, కశ్మీర్‌గడ్డ ప్రాంతంలో నేటి నుంచి మరోసారి ప్రభుత్వ, ఐఎంఏ వైద్యుల బృందంతో పరీక్షలు చేయిస్తామని కరీంనగర్‌ జిల్లా కలెక్టర్‌ శశాంక తెలిపారు. ఇందుకు ప్రజలంతా సంపూర్ణంగా సహకరించాలని, ఇళ్లలో ఉన్న వారంతా తప్పనిసరిగా పరీక్షలు చేయించుకోవాలని కోరారు. స్థానిక కలెక్టరేట్‌లోని సమావేశ మం దిరంలో సోమవారం సాయంత్రం ఏర్పాటు చేసిన విలేకరుల స మావేశంలో సీపీ కమలాసన్‌రెడ్డి, మేయర్‌ వై సునీల్‌రావుతో కలిసి ఆయన మాట్లాడారు. ఇండోనేషియా వారితో తిరిగిన వ్యక్తికి గతం లో పాజిటివ్‌ రాగా, ఇప్పుడు వారి కుటుంబంలోని ఇద్దరు మహిళలు తల్లి, సోదరికి పాజిటివ్‌ వచ్చిందని తెలిపారు. వీరి కుటుబంలో ఎనిమిది మంది సభ్యులు ఉండగా, అందులో ముగ్గురు పిల్లలు ఐదేళ్లలోపు ఉన్నారని తెలిపారు. కాగా, కుటుంబ సభ్యు లందరినీ గాంధీ దవాఖానకు తరలించామని, ఇండోనేషియా వాసులతోపాటు ఈ కుటుంబంతో సన్నిహితంగా మెలిగిన వారిని గుర్తించేందుకు అన్ని చర్యలూ తీసుకుంటున్నామని చెప్పారు. వీరితో సన్నిహితంగా ఉన్నవారందరూ స్వచ్ఛందంగా ముందుకు రావాలని కోరారు. నగర ప్రజలంతా జాగ్రత్తగా ఉండాలని, ప్రతి ఒక్కరూ సామాజిక దూరం పాటించాలని సూచించారు. ముకరంపురలో ఉన్నవారందరూ తమకు ఎలాంటి లక్షణాలున్నా వెంటనే వైద్యాధికారులు, అధికారులను సంప్రదించాలని కోరారు. జిల్లాలో క్వారంటైన్‌లో ఉన్న వారందరికీ మరోసారి వైద్య పరీక్షలు నిర్వహించిన తర్వాతే ఇళ్లకు పంపిస్తామని స్పష్టం చేశారు. కరీంనగర్‌లో రికార్డు స్థాయిలో 105 మందికి టెస్టులు చేయించామని, రాష్ట్రంలో ఈ స్థాయిలో టెస్టులు చేసిన ప్రాంతం మనదేనని తెలిపారు. 

మరింత కఠినంగా కర్ఫ్యూ: సీపీ 

కరోనా వైరస్‌ వ్యాప్తి నేపథ్యంలో కరీంనగర్‌లో కర్ఫ్యూను రాత్రి మరింత కఠినంగా అమలు చేస్తామని సీపీ కమలాసన్‌రెడ్డి స్పష్టం చేశారు. ఈ సమయంలో రోడ్లపై కనబడితే కేసులు పెడుతామని చెప్పారు. తమకున్న సమాచారం మేరకు పాజిటివ్‌ వచ్చిన వ్యక్తి చాలా మందితో తిరిగారని, వారందరూ స్వచ్ఛందంగా ముందుకు వచ్చి పరీక్షలు చేయించుకోవాలని సూచించారు. అలా చెప్పకుండా తప్పించుకునే ప్రయత్నం చేస్తే కేసులు నమోదు చేస్తామని హెచ్చరించారు. పోలీసు విధులు నిర్వహించేందుకు 35 ఏళ్లలోపు ఉండి ఆరోగ్యంగా ఉన్న ఎవరైనా వలంటీర్లు ముందుకు వస్తే ఆహ్వానిస్తున్నామని, పోలీసులు అవసరం లేని ప్రాంతాల్లో వీరి సేవలను వినియోగించుకుంటామని చెప్పారు. నగర మేయర్‌ వై సునీల్‌రావు మాట్లాడుతూ, వైరస్‌ వ్యాప్తి చెందకుండా ప్రజలందరూ సంపూర్ణంగా సహకరించి సామాజిక దూరం పాటించాల్సినా అవసరం ఉందని సూచించారు. 

వలస కూలీలకు సాయం..

లాక్‌డౌన్‌ వల్ల జిల్లాలోని 14,995 మంది వలస కూలీలు ఇబ్బందులు పడుతున్నారని, వీరిని ఆదుకునేందుకు ప్రభుత్వం ప్రతి ఒక్కరికీ 12 కిలోల బియ్యం, 500 చొప్పున ఇచ్చేందుకు క్షేత్రస్థాయిలో ఆదేశాలు ఇచ్చినట్లు కలెక్టర్‌ శశాంక చెప్పారు. ఆహార భద్రత ఉన్నవారికి ఈ పథకం వర్తించదని, మంగళవారం సాయంత్రం వరకు 179.84 మెట్రిక్‌ టన్నుల బియ్యం, 74.97 లక్షల నగదు పంపిణీ చేస్తామని తెలిపారు. వంటకు ఇబ్బందులు ఉన్నవారికి వండిన పదార్థాలను అందిస్తున్నామని చెప్పారు.


logo