శనివారం 23 జనవరి 2021
International - Jan 09, 2021 , 01:17:21

పక్కా ప్లాన్‌తోనే!

పక్కా ప్లాన్‌తోనే!

  • వారాలపాటు క్యాపిటల్‌ ఆక్రమణకు పథకం
  • సకల సౌకర్యాలతో ట్రంప్‌ గ్యాంగులు దాడికి సన్నద్ధం
  • ఆక్రమణపై సోషల్‌ మీడియాలో బహిరంగంగానే చర్చ
  • దాడులను అడ్డుకొనేందుకు సిద్ధంకాని భద్రతా బలగాలు
  • ఘర్షణలో గాయపడిన పోలీస్‌ బ్రయాన్‌ సిక్‌నిక్‌ మృతి

వాషింగ్టన్‌, జనవరి 8: క్యాపిటల్‌ హిల్‌పై దాడికి దేశాధ్యక్షుడు ట్రంప్‌ మద్దతుదారులు కొన్ని నెలల క్రితం నుంచే కుట్ర పన్నారని వెల్లడైంది. క్యాపిటల్‌ హిల్‌ ఆవరణలో వారాల తరబడి తిష్ట వేసి ఎన్నికల ఫలితాలను ట్రంప్‌కు అనుకూలంగా మార్చేలా కాంగ్రెస్‌పై ఒత్తిడి తేవాలని ప్రణాళిక రచించినట్టు అధికారుల దర్యాప్తులో తేలింది. ట్రంప్‌కు మద్దతిస్తున్న శ్వేతజాతి దురహంకారులు క్యాపిటల్‌ హిల్‌పై దాడి గురించి సోషల్‌ మీడియాలో చర్చించుకున్నట్టు తేలింది. అయినప్పటికీ దాడులను నిలువరించేందుకు క్యాపిటల్‌ హిల్‌ పోలీస్‌ విభాగం చర్యలు చేపట్టలేదని అమెరికా పోలీస్‌ ఉన్నతాధికారులు విమర్శిస్తున్నారు. కాగా, క్యాపిటల్‌ హిల్‌పై దాడిని అధ్యక్షుడు ట్రంప్‌ ఎట్టకేలకు ఖండించారు. దాడులు చేసినవారు నిజమైన అమెరికన్లు కాదంటూ గురువారం ఓ వీడియోను విడుదల చేశారు. మరోవైపు పదవిలో ఉండగా తాను చేసిన తప్పులకు స్వీయ క్షమాభిక్ష పెట్టుకొనే అంశంపై తన సన్నిహితులతో ట్రంప్‌ చర్చించినట్టు అమెరికా మీడియా పేర్కొన్నది.  

ట్రంప్‌ ట్వీట్లే ప్రేరణ

బుధవారం అమెరికా కాంగ్రెస్‌పై దాడిచేసిన వేల మంది శ్వేతజాతి అతివాదులు.. అధ్యక్షుడు ట్రంప్‌ ట్వీట్లతోనే ప్రేరణ పొందారని సమాచారం. ‘ఎన్నికల్లో అక్రమాలు జరిగాయి.. ఎన్నికల ఫలితాలను డెమోక్రాట్లు తస్కరించాలని చూస్తున్నారు.. దేశాన్ని రక్షించటానికి హింసకైనా వెనుకాడకూడదు’ అంటూ ట్రంప్‌ పలుసార్లు ట్వీట్లు చేశారు. దాంతో తెల్లజాతి అతివాదులు రెచ్చిపోయారు. ‘స్టాప్‌ ద స్టీల్‌' (ఎన్నికల ఫలితాల తస్కరణను అడ్డుకోండి) ఉద్యమ నాయకులు జనవరి 6న క్యాపిటల్‌ హిల్‌ ప్రాంగణాన్ని ఆక్రమించుకుందామని గతేడాది డిసెంబర్‌ 23వ తేదీనే ట్వీట్లతో పిలుపునిచ్చారు. ‘ఎన్నికల్లో బైడెన్‌ గెలిచినట్టు సెనేటర్లు ప్రకటిస్తే హింసకు దిగుదాం’ అని డిసెంబర్‌ 12న ‘మై మిలీషియా డాట్‌ కామ్‌' వెబ్‌సైట్‌లో ఓ పోస్టర్‌ దర్శనమిచ్చింది. ‘క్యాపిటల్‌ హిల్‌ను ఆక్రమించండి.. లేదా ఆక్రమించే ప్రయత్నంలో మరణించండి’ అని పలువురు అతివాదులు సోషల్‌మీడియాలో పిలుపునిచ్చారు.

ముందే పసిగట్టినా సిద్ధంకాని పోలీసులు

ట్రంప్‌ వైఖరితో కొంతకాలంగా హింసాత్మక చర్యలతో రెచ్చిపోతున్న శ్వేతజాతి అతివాదులను అమెరికా జాతీయ నిఘా సంస్థలు సునిశితంగా గమనిస్తున్నాయి. ట్రంప్‌కు వీరాభిమానులుగా చెప్పుకొంటూ నల్లజాతీయులను తీవ్రంగా ద్వేషిస్తున్న ‘ప్రౌడ్‌ బాయ్స్‌' సంస్థ నాయకుడు ఎన్‌రిక్‌ టారియోను గత సోమవారమే ఎఫ్‌బీఐ పోలీసులు ఓ విద్వేష కేసులో అరెస్టు చేశారు. తెల్ల జాతి సుప్రిమసీ (తెల్లవాళ్లే ఉన్నతులని భావించే) గ్యాంగులే అమెరికా భద్రతకు పెను ముప్పుగా మారనున్నాయని గతేడాది డిసెంబర్‌లో హోంలాండ్‌ సెక్యూరిటీ విభాగం ఓ నివేదికలో ప్రభుత్వాన్ని హెచ్చరించింది. అయినప్పటికీ క్యాపిటల్‌ హిల్‌ పోలీసులు సరైన భద్రతా చర్యలు తీసుకోలేదని ఆ విభాగంలో గతంలో పనిచేసిన ల్యారీ షేఫర్‌ విమర్శించారు.

ట్రంప్‌కు అణ్వాయుధాలు దొరకనివ్వద్దు: పెలోసీ

మానసిక చాంచల్యంతో నిర్ణయాలు తీసుకొంటున్న  ట్రంప్‌కు అణ్వాయుధాలు అందకుండా చూడాలని అమెరికా జాయింట్‌ చీఫ్స్‌ ఆఫ్‌ స్టాఫ్‌ చైర్మన్‌ జనరల్‌ మార్క్‌ మిలేకు కాంగ్రెస్‌లోని ప్రతినిధుల సభ స్పీకర్‌ నాన్సీ పెలోసీ లేఖ రాశారు. ట్రంప్‌ ప్రమాదకర వ్యక్తిగా మారారని.. ఆయన చేతికి అణుబాంబులను ప్రయోగించే కోడ్లు వెళితే ఊహించని విపత్తులు ఎదురు కావచ్చని ఆందోళన వ్యక్తంచేశారు. ట్రంప్‌ను ఆయన మంత్రివర్గం వెంటనే అధికారం నుంచి తప్పించాలని డిమాండ్‌ చేశారు. లేదంటే అధ్యక్షుడిపై అభిశంసన చేపడుతామని హెచ్చరించారు.  

క్యాపిటల్‌ పోలీస్‌ చీఫ్‌ రాజీనామా

క్యాపిటల్‌ హిల్‌ పోలీస్‌ చీఫ్‌ స్టీవెన్‌ సండ్‌ తన పదవికి రాజీనా చేయనున్నట్టు ప్రకటించారు. కాగా, ట్రంప్‌ మద్దతుదారుల దాడిలో గాయపడిన పోలీస్‌  అధికారి బ్రయాన్‌ చనిపోయారు. 

ట్రంప్‌ వైఖరే కారణం: బైడెన్‌

వనితా గుప్తా ఇండో అమెరికన్లు గర్వించదగ్గ కూతురని ప్రశంస

వాషింగ్టన్‌: డొనాల్డ్‌ ట్రంప్‌ ప్రజాస్వామ్యం పట్ల అనుసరిస్తున్న వ్యతిరేక వైఖరి  ఫలితమే క్యాపిటల్‌ భవనంపై హింసాత్మక దాడులని అమెరికా అధ్యక్షుడిగా ఎన్నికైన జో బైడెన్‌ అన్నారు. కాంగ్రెస్‌ భవనంపై ట్రంప్‌ మద్దతుదారుల దాడి అమెరికా చరిత్రలో చీకటి రోజని అభివర్ణించారు. ఇది అమెరికా ప్రజాస్వామ్యంపై దాడి అన్నారు. క్యాపిటల్‌ హిల్‌లో నిరసనల్లో పాల్గొన్నవారిని తిరుగుబాటుదారులుగా, స్థానిక ఉగ్రవాదులుగా అభివర్ణించారు. ఇదిలా ఉండగా, ప్రముఖ లాయర్‌ వనితాగుప్తాను..  ‘ఇండో అమెరికన్లు గర్వించదగ్గ కూతురు అని’ బైడెన్‌ ప్రశంసించారు. వనితను అసోసియేట్‌ అటార్నీ జనరల్‌గా బైడెన్‌ ఇటీవలే నియమించారు. 

హెచ్‌-1బీలో లాటరీ  పద్ధతి బంద్‌

వాషింగ్టన్‌, జనవరి 8: హెచ్‌-1బీ వీసాల జారీకి ఇప్పటివరకు అనుసరిస్తున్న లాటరీ పద్ధతిని పక్కనబెట్టి ఉద్యోగి వేతనం, నైపుణ్యం ఆధారంగా వీసాలను జారీ చేయాలని ట్రంప్‌ సర్కార్‌ నిర్ణయించింది. ఈ మేరకు హెచ్‌-1బీ ఎంపిక విధానంలో పలు మార్పులను తీసుకొచ్చింది. మరో 60 రోజుల్లో ఈ మార్పులు అమల్లోకి రానున్నాయి. జో బైడెన్‌ నేతృత్వంలోని కొత్త సర్కారు మరో రెండు వారాల్లో కొలువుదీరనున్నది. ట్రంప్‌ సర్కారు తీసుకొచ్చిన ఈ నోటిఫికేషన్‌పై బైడెన్‌ యంత్రాంగం సమీక్ష నిర్వహించే అవకాశం ఉందని సాంకేతిక నిపుణులు భావిస్తున్నారు. 


logo