మంగళవారం 14 జూలై 2020
International - May 29, 2020 , 02:35:35

అవసరమైన మేరకే బోధన.. నైపుణ్యాలకు ప్రాధాన్యం

అవసరమైన మేరకే బోధన.. నైపుణ్యాలకు ప్రాధాన్యం

  • సబ్జెక్టు లేకుండానే బోధన
  • విప్లవాత్మక మార్పు దిశగా ఫిన్లాండ్‌ విద్యావ్యవస్థ   
  • సంప్రదాయ సబ్జెక్టుల స్థానంలో  సమీకృత విధానం
  • పాఠశాల విద్య మొత్తంలో ఒకే ఒక్క పబ్లిక్‌ పరీక్ష 

హెల్సింకీ, మే 28: ప్రపంచంలో ఏ దేశ విద్యావ్యవస్థ అత్యుత్తమైనది అనే ప్రశ్నకు మరో మాట లేకుండా వచ్చే సమాధానం ఫిన్లాండ్‌. ఇక్కడి పాఠశాల వాతావరణం విద్యార్థులకు సొంత ఇంటిలో ఉన్నంత సౌకర్యవంతంగా ఉంటుంది. చదవు, భోజనం, పుస్తకాలు దాదాపు అన్నీ ఉచితమే. హోంవర్క్‌ అనేది నిషిద్ధం. తాజాగా ఫిన్లాండ్‌ ప్రభుత్వం తన విద్యావ్యవస్థను మరో మెట్టుపైకి తీసుకెళ్లే నిర్ణయం తీసుకున్నది. ఈ ఏడాది నుంచే పాఠశాలల్లో సంప్రదాయ సబ్జెక్టులను బోధించకూదని నిర్ణయించింది. అంటే సాహిత్యం, సాంఘికశాస్త్రం, ఫిజిక్స్‌, మ్యాథ్స్‌ అంటూ ఇక ప్రత్యేకంగా సబ్జెక్టులు ఉండవు. 

అవసరం మేరకే బోధన

పాఠశాలలో సబ్జెక్టులు లేకుంటే విద్యార్థులు మరేం చదువుతారని అందరికీ సందేహం రావచ్చు. ఇకనుంచి ఈ సబ్జెక్టులన్నీ కలిపేసి ఇంటర్‌ డిసిప్లినరీ బోధన ఉంటుంది. అంటే ఉదాహరణకు రెండో ప్రపంచయుద్ధం గురించి విద్యార్థి తెలుసుకోవాలని కోరుకుంటే చారిత్రక, భౌగోళిక, గణిత అంశాలను జోడించి దానిగురించి టీచర్‌ వివరిస్తారు. ఈ విధంగా విద్యార్థులకు పాఠశాలస్థాయిలోనే తన భవిష్యత్తును నిర్ణయించుకునేలా శిక్షణ ప్రోత్సాహం ఇస్తారు. దాంతో విద్యార్థి తనకు నచ్చిన, తన భవిష్యత్తుకు అవసరమైన అంశాలనే చదువుతాడు. అన్ని సబ్జెక్టుల జోలికి వెళ్లడు. ఉదాహరణకు ఒక విద్యార్థి హోటల్‌రంగంలోకి వెళ్లాలని నిర్ణయించుకుంటే.. అతడి ఉద్యోగానికి అవసరమైన భాష, ఆర్థికశాస్త్ర అంశాలు, కమ్యూనికేషన్‌ స్కిల్స్‌ మాత్రమే బోధిస్తారు. ఫిన్లాండ్‌లో బోధన వృత్తికి అత్యంత గౌరవ స్థానం ఉంది. టీచర్లకు వేతనాలు కూడా భారీమొత్తంలోనే ఉంటాయి. చదువులో చిన్నప్పటినుంచీ అత్యుత్తమ ప్రతిభ చూపినవారినే ఉపాధ్యాయ వృత్తి చేపట్టేందుకు అనుమతిస్తారు. 

పోటీ ఊసేలేని విద్యావ్యవస్థ

ఫిన్లాండ్‌ ప్రభుత్వం చిన్నారుల సంక్షేమంపట్ల అమిత శ్రద్ధ తీసుకుంటుంది. పిల్లలకు చదువు ఏమాత్రం భారం కాకుండా అనేక జాగ్రతలు తీసుకుంటారు. ఏడేండ్లు నిండిన తర్వాతే పాఠశాలలో చేర్చుకుంటారు. పాఠశాల విద్య కేవలం 9 సంవత్సరాలు మాత్రమే. అంతేకాదు పాఠశాల జీవితం మొత్తంలో ప్రభుత్వం అధికారికంగా నిర్వహించేది ఒకే ఒక్క పరీక్ష. తొమ్మిదేండ్ల పాఠశాల విద్య పూర్తిచేసిన విద్యార్థులకు నేషనల్‌ మెట్రిక్యులేషన్‌ టెస్ట్‌ ఉంటుంది. అదికూడా కచ్చితంగా రాయాలని లేదు. యూనివర్సిటీలో చేరాలనుకొనేవారు ఈ పరీక్ష రాస్తారు. మిగతావారు మూడేండ్ల వృత్తిపరమైన కోర్సులో చేరుతారు. అక్కడ ఎంచుకున్న వృత్తిలో తర్పీదు ఇస్తారు. సార్వత్రిక పరీక్షల స్థానంలో వ్యక్తిగత ప్రతిభ ఆధారంగా టీచర్లే గ్రేడింగ్‌ ఇస్తారు. ఈ గ్రేడింగ్‌లను విద్యాశాఖ నమోదుచేస్తుంది. ఫిన్లాండ్‌ విద్యా విధానంలో పోటీకి తావులేదు. పరస్పర సహకారానికి అధిక ప్రాధాన్యం ఇస్తారు. ‘మా విద్యావ్యవస్థలో టీచర్ల జవాబుదారీ అనేది ఉండదు. ఎందుకంటే బాధ్యత మరిచిపోతేనే కదా.. జవాబుదారీ గురించి మాట్లాడేది’ అన్న ఫిన్లాండ్‌ విద్యాశాఖ మాజీ డైరెక్టర్‌ పాసీ సెహెల్‌బర్గ్‌ మాటలు అక్కడి విద్యావ్యవస్థ పనితీరుకు నిదర్శనం.


logo