శనివారం 26 సెప్టెంబర్ 2020
International - Jul 23, 2020 , 07:07:32

కరోనాకు డూప్‌! కృత్రిమంగా వైరస్‌ను సృష్టించిన పరిశోధకులు

కరోనాకు డూప్‌! కృత్రిమంగా వైరస్‌ను సృష్టించిన పరిశోధకులు

  • వ్యాక్సిన్‌ అభివృద్ధికి దోహదం

వాషింగ్టన్ : కరోనా వైరస్‌ మాదిరిగానే మనుషుల్లో యాంటీబాడీస్‌ను ఉత్పత్తిచేసే ‘బలహీన వైరస్‌'ను శాస్త్రవేత్తలు కృత్రిమంగా అభివృద్ధి చేశారు. సురక్షితంగా వ్యాక్సిన్‌ అభివృద్ధి పరీక్షలు నిర్వహించడంలో ఇది దోహదపడుతుందని అమెరికాలోని వాషింగ్టన్‌ యూనివర్సిటీ స్కూల్‌ ఆఫ్‌ మెడిసిన్‌ పరిశోధకులు తెలిపారు. కరోనా మహమ్మారి గాలి ద్వారా కూడా సులభంగా వ్యాప్తి చెందుతుండడం, పైగా అది ప్రాణాంతకం కావడం వల్ల అత్యంత భద్రత పరిస్థితుల నడుమ పరీక్షలు నిర్వహించాల్సి వస్తున్నదని, దీంతో వ్యాక్సిన్‌ అభివృద్ధికి అవరోధాలు ఏర్పడుతున్నాయని పరిశోధకులు తెలిపారు.

అయితే ఈ కృత్రిమ వైరస్‌ ప్రమాదకరం కాదు కాబట్టి సులభంగా పరీక్షలు నిర్వహించవచ్చని చెప్పారు. అమెరికాతోపాటు అర్జెంటినా, బ్రెజిల్‌, మెక్సికో, కెనాడా వంటి దేశాల్లోని పరిశోధకులకు ఈ వైరస్‌ను పంపించినట్లు వెల్లడించారు. గుర్రాలు, పందుల్లో ఉండే వీఎస్‌వీ వైరస్‌ను కరోనా వైరస్‌తో జన్యుమార్పిడి చేసి కొత్త వైరస్‌ను సృష్టించినట్లు చెప్పారు. కరోనా రోగుల్లోని యాంటీబాడీస్‌ కరోనా వైరస్‌తోపాటు ఈ హైబ్రిడ్‌ వైరస్‌ను కూడా అడ్డుకున్నట్లు తెలిపారు. 


logo