లండన్: యునైటెడ్ కింగ్డమ్కు చెందిన ఓ మత్స్యకారుడు రికార్డు బ్రేక్ చేశాడు. 7 అడుగుల పొడవు, 250 కిలోలు ఉన్న ఓ భారీ షార్క్ను పట్టుకున్నాడు. డెవోన్ తీరంలో చేపల వేటకు వెళ్లిన సిమోన్ డేవిడ్సన్ అనే మత్స్యకారుడికి ఈ భారీ చేప చిక్కింది. గంటపాటు చెమటోడ్చిన అతడు దానిని పడవలోకి లాగగలిగాడు. ఆ తర్వాత మరో ఐదుగురు కలిసి దానిని తిరిగి సముద్రంలోకి వదిలేశారు. దీనికి సంబంధించిన వీడియో ఇప్పుడు వైరల్( Viral Video )గా మారింది. ఈ భారీ షార్క్.. అతని పడవకు దగ్గరగా వచ్చి వెళ్తుండటం ఆ వీడియోలో చూడొచ్చు.
1993లో ఓ మత్స్యకారుడికి 229 కిలోల షార్క్ దొరకగా.. ఇప్పుడా రికార్డు బ్రేక్ అయింది. తన ఎరను అందుకున్నది ఓ భారీ షార్క్ అని తనకు ముందు తెలియలేదని డేవిడ్సన్ అన్నాడు. దానిని పడవలోకి ఎలాగోలా లాగిన తర్వాత అది రాక్షస చేప అని తెలిసిందని చెప్పాడు. గంట పాటు ఎంతో కష్టపడాల్సి వచ్చిందని, కాళ్లు, చేతులు వణికిపోయాయని అతడు తెలిపాడు. దానిని పడవలోకి తీసుకున్న తర్వాత షార్క్ కొలతలు తీసుకొని తిరిగి సముద్రంలోకి వదిలేశారు.