వంటల్లో ఏ నూనె వాడితే ఆరోగ్యానికి మంచిది?రాధ, కుషాయిగూడ
చాలామంది అడుగుతున్న ప్రశ్నే ఇది. ఈ విషయంలో రకరకాల సందేహాలు, ఎన్నో అనుమానాలు. శరీరంలో కొవ్వు శాతం నియంత్రణలో ఉండాలన్నా, జీవక్రియ సరిగ్గా జరగాలన్నా వంట కోసం సరైన నూనెను ఎంచుకోవడం తప్పనిసరి. సహజసిద్ధమైన ‘వర్జిన్’ ఆయిల్స్ ఆరోగ్యానికి మేలు చేస్తాయి. అయితే, ఉత్పత్తిదారులు ఎక్కువకాలం నిల్వచేసినా తాజాగా ఉండేందుకు వీలుగా కొన్ని రసాయనాలను కలిపి ‘ఎక్స్ట్రా వర్జిన్’ నూనెలు తయారు చేస్తారు. కొన్ని అసాధారణ పరిస్థితుల్లో ఇవి ఆరోగ్యానికి హానికరంగా మారుతాయి. నూనెల్లో ఎన్నో పోషకాలు, విటమిన్లు ఉంటాయి. శరీరంలోని ప్రతి అవయవానికీ పోషకాలు అవసరం. నూనెలు నాడీవ్యవస్థ, మెదడు, జీర్ణవ్యవస్థలపై ప్రభావం చూపుతాయి. శరీరానికి అవసరమయ్యే విటమిన్ – ఎ, డి, ఇ, కె లను జీర్ణవ్యవస్థ నూనెల ద్వారానే గ్రహించి నిల్వచేస్తుంది. నూనెల్లో ముఖ్యంగా చూడాల్సినవి రెండు. ఒకటి.. వాటిలోని పాలీ అన్సాచురేటెడ్ ఫ్యాట్ కంటెంట్ (పీయూఎఫ్ఏ – పుఫా), మరొకటి.. మోనో అన్సాచురేటెడ్ ఫ్యాట్ కంటెంట్ (ఎంయూఎఫ్ఏ- ముఫా). వీటితోపాటు ఒమేగా-6, ఒమేగా-3 ఏ పరిమాణంలో ఉన్నాయో పరిశీలించాలి. వీటిలో ‘ముఫా’ అనేది యాంటీ ఆర్థ్రోజెనిక్. ఇది రక్తంలోని ప్లేట్లెట్స్ పనితీరును సరిచేస్తుంది. రక్తం గడ్డకట్టకుండా చూస్తుంది. దీనిలోని ఒమేగా-3 మధుమేహం, మానసిక ఒత్తిడి నుంచి కాపాడుతుంది. ‘ముఫా’ గుండెకు మేలు చేస్తుంది. గుండె సంబంధ వ్యాధుల నుంచి రక్షిస్తుంది. సాధారణంగా, ఆ ప్రాంత సంప్రదాయాన్ని బట్టి నూనెల వాడకం ఉంటుంది. అయితే ఏ ఒక్క నూనెలో కూడా సకల సుగుణాలూ ఉండవని గుర్తించాలి. అందుకే రకరకాల నూనెల కాంబినేషన్ తప్పనిసరి. పక్షానికోసారి వంటనూనెను మారుస్తూ ఉండాలి. ఆరోగ్య సమస్యలు ఉన్నవారు డాక్టర్ను సంప్రదించాకే ఏ నిర్ణయమైనా తీసుకోవాలి.
మయూరి ఆవుల, న్యూట్రిషనిస్ట్,www.trudiet.in