బీజింగ్: ఒక కారు కొండ అంచు నుంచి లోయలోకి దూసుకెళ్లింది. అందులోని ఒక మహిళ తృటిలో జంప్ చేసింది. కాగా, కారు లోపలే ఉన్న మరో మహిళ కూడా అదృష్టవశాత్తు ప్రాణాలతో బయటపడింది. అయితే ఆమె తీవ్రంగా గాయపడింది. ఒళ్లు జలదరింపజేసే ఈ ఘటన చైనాలో జరిగింది. ఒక కుటుంబం జిన్జియాంగ్లోని కొండ ప్రాంత అందాలను చూసేందుకు దుకు హైవే పక్కగా కారును నిలిపింది. ఆ కొండ ప్రాంతం ప్రముఖ పర్యాటక కేంద్రం కూడా.
కాగా, కారు నుంచి దిగిన ఒక వ్యక్తి డ్రింక్ తాగుతున్నాడు. ఇంతలో ఉన్నట్టుండి కారు కొండ అంచు నుంచి లోయలోకి జారసాగింది. అప్రమత్తమైన ఆ వ్యక్తి కారును నిలుపేందుకు ప్రయత్నిస్తూ వెనుక డోర్ తీశాడు. దీంతో అందులో ఉన్న మహిళ తృటిలో కారు నుంచి బయటకు జంప్ చేసింది. అయితే కారు ముందు సీటులో కూర్చొన్న మరో మహిళ సీటు బెల్ట్ పెట్టుకోవడంతో వెంటనే బయటకు రాలేకపోయింది.
ఇంతలో అందరూ చూస్తుండగా ఆ కారు కొండ అంచు నుంచి లోయలోకి దూసుకెళ్లింది. అదృష్టం బాగుండి కారులో ఉన్న మహిళ ప్రాణాలతో బయటపడింది. అయితే ఆమె నడుంకు గాయమైంది. ఒళ్లు జలదరింపజేసే ఈ వీడియో సామాజిక మాధ్యమాల్లో వైరల్ అయ్యింది. కాగా, కారు ఉన్నట్టుండి కదలడానికి కారణం ఏమిటన్నది అంతుపట్టలేదు. హ్యాండ్ బ్రేక్ ఫెయిల్ లేదా కేబుల్ కట్ అయి ఉంటుందని కొందరు నెటిజన్లు అనుమానం వ్యక్తం చేశారు.