బ్రెజిల్‌లో ఘోర రోడ్డు ప్రమాదం.. 32 మంది దుర్మరణం

బ్రసిలియా : దక్షిణ బ్రెజిల్‌లో ఘోర రోడ్డు ప్రమాదం జరిగింది. ప్రయాణికులతో వెళ్తున్న బస్సును అతివేగంగా వచ్చిన ట్రక్కు నేరుగా ఢీకొట్టడంతో 32 మంది దుర్మరణం చెందగా.. 15 మందికి తీవ్రగాయాలయ్యాయి. స్వోపౌలో రాష్ట్రంలో టగ్వాయ్‌ పట్టణ సమీపంలో టగ్వాయ్‌-తక్వరితుబా రహదారిపై ఉదయం 7 గంటల సమయంలో ఈ దుర్ఘటన జరిగింది. ప్రమాదం జరిగిన సమయంలో బస్సులో 53 మంది ప్రయాణిస్తున్నట్లు తెలుస్తోంది.

పోలీసులు ఘటనా స్థలానికి చేరుకొని  గాయపడిన వారిని సమీప ఆస్పత్రులకు తరలించారు. మృతుల సంఖ్య మరింత పెరిగే అవకాశముందని భావిస్తున్నారు.  ప్రమాద ధాటికి మృతదేహాలు చిన్నభిన్నమవడంతో వాటిని బయటకు తీసి దవాఖానకు తరలించడం పోలీసులకు కష్టతరంగా మారింది. ప్రమాదం కారణంగా రహదారిపై దాదాపు 4 గంటలపాటు ట్రాఫిక్‌కు తీవ్ర అంతరాయం ఏర్పడింది. అతివేగమే ప్రమాదానికి కారణమని భావిస్తున్నారు. చనిపోయిన 32 మందికి సంతాపంగా టగ్వాయ్‌ మున్సిపాలిటీ మూడు రోజులు సంతాప దినాలుగా ప్రకటించింది. ప్రమాదంపై పోలీసులు దర్యాప్తు చేస్తున్నారు.  

లోక‌ల్ టు గ్లోబ‌ల్‌.. వార్త ఏదైనా.. అన్నీ ఒకే యాప్‌లో. న‌మ‌స్తే తెలంగాణ ఆండ్రాయిడ్ యాప్ డౌన్‌లోడ్ చేసుకోండి.