తిరిగి ఇందిరమ్మ చేతిలోకి అధికారం

ఐరన్‌ లేడీ ఆఫ్‌ ఇండియాగా పేరుగాంచిన ఇందిరాగాంధీ.. ఎవర్నీ ఖాతరు చేయకుండా దేశంలో ఎమర్జెన్సీని విధించి వార్తల్లో వ్యక్తిగా నిలిచారు. ఎమర్జెన్సీ ఎత్తివేసిన తర్వాత జరిగిన ఎన్నికల్లో ఘోర పరాజయం చవిచూసిన ఇందిరాగాంధీ.. ఆ తర్వాత 1980 లో జరిగిన ఎన్నికల్లో 354 సీట్లను గెలుచుకుని అధికార పగ్గాలను చేతబట్టారు. ఇందిరాపై అసంతృప్తి కారణంగా ఏర్పాటైన జనతా పార్టీ ప్రభుత్వం.. ఇందిరా తిరిగి అధికారంలోకి రావడానికి అదే ప్రభుత్వం మార్గం సుగమం చేసింది. ఈ ఎన్నికల ప్రచారం 63 రోజులు కొనసాగగా.. 62 ఏండ్ల వయసులో ఇందిరాగాంధీ రోజుకు 20 ప్రసంగాలు చేసి మొత్తం 40 వేల కిలోమీటర్లు సందర్శించి కొత్త రికార్డు నెలకొల్పారు. ఈ ఎన్నికల్లో ఇందిరమ్మ ఘనవిజయం సాధించేందుకు.. ఊచకోత జరిగిన పాట్నా సమీపంలోని బెల్చీ గ్రామాన్ని సందర్శించేందుకు ఏనుగుపై కూర్చుండి వెళ్లడం ఉపయోగపడిందని రాజకీయ నిపుణులు చెప్తుంటారు.

అమెరికాలో మొదటి ఎన్నికలు

అమెరికాలో 1789 లో ఇదే రోజున మొదటి ఎన్నికలు జరిగాయి. ఈ ఎన్నికలలో ప్రత్యేకత ఏమిటంటే.. ఎవరికైతే ఆస్తి ఉంటుందో వారికి మాత్రమే ఓటు హక్కు కల్పించడం. జార్జ్ వాషింగ్టన్ మొదటి ఎన్నికలలో గెలిచి.. 1789 ఏప్రిల్ 30 న తొలి అధ్యక్షుడిగా ప్రమాణం స్వీకరించారు. ఆనాటి నుంచి మొన్నటి వరకు జరుగుతున్న అధ్యక్ష ఎన్నికలు అదే ఎలక్టోరల్ కాలేజీ వ్యవస్థలో జరుగుతుండటం విశేషం.