జాబ్ ఇంటర్వ్యూ లేదా క్రికెట్లో నెగ్గేందుకు అవసరమైన కసరత్తు, మెళకువలను కలలో (డ్రీమ్లో) అభ్యసన చేస్తే ఎలా ఉంటుంది? ఇదేదో హాలీవుడ్ సైంటిఫిక్ థ్రిల్లర్ సినిమాను తలపిస్తున్నది కదూ! కానీ, నిజం. కెరీర్ అభివృద్దికి అవసరమైన మెళకువలను కలలో కూడా పూర్తిచేసుకోవచ్చని తాజా అధ్యయనం చెబుతున్నది. అదే ‘డ్రీమ్ టు బెటర్ పర్ఫామెన్స్’
ఏమిటీ ‘డ్రీమ్ టు బెటర్ పర్ఫామెన్స్’?
ఒక పని చేసేటప్పుడు గతంలో మనం చేసిన పొరపాట్లను గుర్తించి వాటిని సవరిస్తూ.. భవిష్యత్తులో ఆ పని విజయవంతంగా పూర్తవ్వడానికి అవసరమైన కసరత్తును మేళవిస్తూ.. కలల రూపంలో ఆవిష్కరించే అభ్యసన ప్రక్రియే ‘డ్రీమ్ టు బెటర్ పర్ఫామెన్స్’. ర్యాపిడ్ ఐ మూమెంట్ (ఆర్ఈఎం)లో వచ్చే కలల్లో ఇది కొనసాగుతుంది.
కలల ద్వారా నైపుణ్యాలను వృద్ధి చేసుకోవాలంటే, ఏ అంశంలో మెళకువలు సాధించాలనుకుంటున్నారో.. దానికి సంబంధించిన కసరత్తును గతంలో కనీసం ఒక్కసారైనా పూర్తి చేసి ఉండాలని అమెరికాలోని యూనివర్సిటీ ఆఫ్ గ్రీన్విల్లే పరిశోధకులు తెలిపారు. గతంలో చేసిన తప్పులు అప్పటికే మెదడులో రిజిస్టరై ఉండటంతో.. కలలో తర్ఫీదు పొందే సమయంలో ఆ తప్పులు పునరావృతం కాకుండా ఉంటుందన్నారు. 48 మంది విద్యార్థులపై చేసిన అధ్యయనంలో సత్ఫలితాలు వచ్చాయన్నారు. తర్ఫీదు పొందాలనుకున్న అంశానికి సంబంధించిన కలలు వచ్చేలా విద్యార్థులకు కృత్రిమ మేధ (ఏఐ) సాయంతో సంకేతాలను పంపించామని తెలిపారు. నిజజీవితంలోని అభ్యసనతో పోలిస్తే, కలలో వారు మరింత మెరుగ్గా కసరత్తు పూర్తిచేశారన్నారు.
నిద్ర పోయే సమయాన్ని ఆర్ఈఎం, నాన్-ఆర్ఈఎంగా పరిశోధకులు విభజించారు. రెప్ప కింద కండ్లను అటూ, ఇటూ ఆడిస్తూ నిద్రపోయే ప్రక్రియను ఆర్ఈఎం అంటారు. కొన్ని సెకండ్ల నుంచి గరిష్ఠంగా 20 నిమిషాలు మాత్రమే ఈ స్థితి ఉంటుంది. ఇప్పుడు కనే కలల్ని మాత్రమే గుర్తుంచుకోగలం. గాఢ నిద్రలోకి వెళ్లే స్థితిని నాన్-ఆర్ఈఎంగా పిలుస్తారు. ఈ స్థితిలో కన్న కలలు గుర్తుండవు.