హరిణేక్షణ.. జింక లాంటి కండ్లు! గజ గమన.. మత్తేభాన్ని తలపించే నడక! కల కంఠి.. కోయిలను గుర్తుకుతెచ్చే స్వరం! కావ్యాల్లో, ప్రబంధాల్లో ఆమె సౌందర్యానికి వన్యప్రాణులే కొలమానం అయ్యాయి. ఇక, ఆ మృగనయని ఏకంగా మృగ రూపాలనే ఆభరణంగా మలుచుకుంటే.. అందం రెట్టింపు అవుతుంది, అయస్కాంతత్వ శక్తి పదిరెట్లు పెరుగుతుంది. ఆ అలంకరణతో ఏ వేడుకకో వెళితే అన్ని కండ్లూ అటువైపే కొన్ని ఆరాధనగా, కొన్ని అసూయగా!
కాలంతోపాటు కొత్త ఫ్యాషన్ల్లూ పుట్టుకొస్తాయి. కొన్నిసార్లు పాతవే సరికొత్త మార్పులతో అలరిస్తాయి. మత్తగజాలు, మయూరాలు, మీనాల రూపాలు ప్రాచీనకాలం నుంచీ ఆభరణాల్లో కొలువుదీరుతున్నవే. అయితే ఇప్పుడు పాములు, బల్లులు, సీతాకోక చిలుకలు.. ఒకటేమిటి సకల జంతుజాలమూ ఆభరణాల్లో అమరిపోతున్నది. హారాలు, పెండెంట్లు, లోలాకులు, ఉంగరాలు, బ్రేస్లెట్లు.. ప్రతి నగలోనూ వన్యమృగ సమూహమే!
ప్రతి జంతువూ ఓ దైవానికి ప్రతీక. ఏనుగులో వినాయకుడిని చూస్తాం. నెమలి కుమారస్వామి వాహనం. సింహం అమ్మవారి పరివారంలో భాగం. ఇలా, ఏ జంతువు రూపాన్ని ధరిస్తే ఆ దేవత స్వరూపాన్నీ ధరించినట్టే. కుబేరుడి చిహ్నంగా తాబేలును కొలవడం ప్రాచీనకాలం నుంచీ ఉన్న సంప్రదాయమే.
జంతు ఆభరణాలు లేటెస్ట్ ఫ్యాషన్ వేర్పైనా నప్పుతాయి. స్వర్ణాభరణాలే కాకుండా రకరకాల లోహాలతో చేసిన పెండెంట్లూ అందుబాటులో ఉన్నాయి. ధర కూడా చవకే.
కొందరికి పిల్లులంటే ప్రాణం. కొందరికి కుక్కలంటే మక్కువ. కొందరికి పక్షులంటే ఇష్టం. ఇంటి మనుషులతో సమానంగా చూసుకొంటారు. అలాంటి వారికి ఈ పెండెంట్లు బాగా నచ్చుతాయి. కోరిన జంతువు ఆకారంతో జబర్దస్త్గా అలంకరించుకోవచ్చు.
పామంటేనే పది
ఆమడల దూరం పరుగెడతాం. కానీ, ఆ సర్ప రూపమే అందమైన కంఠాభరణమై అందరినీ ఆకర్షిస్తుంది. పడగెత్తినట్టు, చుట్టుకున్నట్టు, నాట్యం చేస్తున్నట్టు.. రకరకాల భంగిమలతో పెండెంట్ నెక్లెస్లను రూపొందిస్తున్నారు. విషానికి విషమే విరుగుడు అన్నట్లు, పాము భయం పోవాలంటే స్నేక్ లాకెట్ వేసుకోవాల్సిందే అన్న వాదనా ఉంది. ‘నా జోలికొస్తే.. నాగకన్యనే!’ అని రోడ్ సైడ్ రోమియోలకు పరోక్ష హెచ్చరికలానూ పనిచేస్తుంది.
ప్రవళిక వేముల