తేజ సజ్జా, ప్రియా ప్రకాష్ వారియర్ జంటగా నటిస్తున్న చిత్రం ‘ఇష్క్’. యస్.యస్.రాజు దర్శకుడిగా పరిచయమవుతున్నాడు. మెగా సూపర్గుడ్ ఫిలిమ్స్ పతాకంపై ఎన్వీప్రసాద్, పారస్జైన్, వాకాడ అంజన్కుమార్ నిర్మిస్తున్నారు. ఏప్రిల్ 23న ప్రేక్షకులముందుకురానుంది. ఈ చిత్ర ట్రైలర్ను గురువారం హీరో సాయితేజ్ విడుదల చేశారు. వాకాడ అప్పారావు మాట్లాడుతూ ‘కొంత గ్యాప్ తర్వాత మా సంస్థ తెలుగులో తీసిన చిత్రమిది. రొమాన్స్, థ్రిల్లర్ అంశాలతో ప్రతి ఒక్కరిని మెప్పిస్తుంది’ అన్నారు. ‘మలయాళంలో విజయవంతమైన కథ ఆధారంగా ఈ సినిమాను తెరకెక్కించాం. 29రోజుల్లో నిర్మాణం పూర్తిచేశాం. రొమాంటిక్ థ్రిల్లర్ ఇది.
స్క్రీన్ప్లే ప్రధానంగా ఆకట్టుకుంటుంది. ప్రతిభావంతులైన సాంకేతిక నిపుణుల సహకారంతో అద్భుతంగా తీర్చిదిద్దాం’ అని దర్శకుడు తెలిపారు. తేజ సజ్జా మాట్లాడుతూ ‘ఆద్యంతం ఉత్కంఠభరితంగా సాగే కథాంశమిది. ప్రేక్షకులకు సరికొత్త అనుభూతినందిస్తుంది. మెగా సూపర్గుడ్ ఫిలిమ్స్ వంటి గొప్ప సంస్థలో సినిమా చేయడం ఆనందంగా ఉంది’ అన్నారు. ఈ చిత్రానికి సినిమాటోగ్రఫీ: శ్యామ్ కె నాయుడు, సంగీతం: మహతి స్వరసాగర్, సాహిత్యం: శ్రీమణి, సమర్పణ: ఆర్.బి.చౌదరి.