మాస్కో: పారాచూట్ హెలికాప్టర్కు చిక్కుకోవడంతో ఒక వ్యక్తి ప్రమాదకరంగా కొంత సేపు గాల్లో వేలాడాడు. గమనించిన ఒకరు దీనిని తన మొబైల్లో చిత్రీకరించి పోలీసులను అప్రమత్తం చేశారు. రష్యన్ ప్రాంతమైన జబాయికల్స్కీ క్రైలోని కాష్టక్ గ్రామంలో గురువారం ఈ ఘటన జరిగింది. ఒక పారాగైడర్ హెలికాప్టర్ నుంచి దూకేందుకు ప్రయత్నించాడు. అయితే అతడు ధరించిన పారాచూట్ హెలికాప్టర్ వెనుక ఉన్న రోటర్కు చిక్కుకున్నది. దీంతో అతడు గాల్లో వేలాడసాగాడు.
కాగా, మాగ్జిమ్ స్టెఫానోవిచ్ అనే వ్యక్తి దీనిని చూశాడు. తొలుత సైనిక విన్యాసంగా ఆయన భావించాడు. తన మొబైల్లో వీడియో రికార్డు చేశాడు. దానిని గమనించగా ఆ వ్యక్తి ప్రమాదకరంగా గాలిలో వేలాడుతున్నట్లు గ్రహించాడు. వెంటనే పోలీసులకు ఫోన్ చేసి అతడిని రక్షించేందుకు మిలిటరీ సహాయం కోరాలని చెప్పాడు.
మరోవైపు ఆ హెలికాప్టర్ మెల్లగా ఆ పారాచూటర్ను కిందకు దించింది. దీంతో అతడికి ఎలాంటి గాయాలు కాలేదు. అనంతరం మాగ్జిమ్ ఈ వీడియోను సామాజిక మాధ్యమాల్లో పోస్ట్ చేయగా అది వైరల్ అయ్యింది.