ఆదివారం 12 జూలై 2020
International - Jun 21, 2020 , 12:48:13

భారత్‌పై మరో దాడికి సిద్ధమైన చైనా

భారత్‌పై మరో దాడికి సిద్ధమైన చైనా

న్యూఢిల్లీ: గల్వన్ వ్యాలీలో చొరబాట్ల ప్రణాళిక విఫలమైన తరువాత చైనా మరో దుర్మార్గపు చర్యకు సిద్ధమైంది. చైనా ఆదివారం నుంచి భారతదేశంపై సైబర్ దాడులను ప్రారంభించాలని కుట్రలు చేస్తున్నది. ఈ సైబర్ దాడిలో, అనేక ప్రభుత్వ సంస్థలు, మీడియా సంస్థలు, ఫార్మా కంపెనీలు, టెలికాం ఆపరేటర్లు మరియు ఒక పెద్ద టైర్ కంపెనీ చైనా హ్యాకర్లను లక్ష్యంగా చేసుకోవచ్చు. ఈ విషయాలను సైబర్ ఇంటెలిజెన్స్ సంస్థ భారత ప్రభుత్వాన్ని హెచ్చరించింది.

సైబర్ ఇంటెలిజెన్స్ సంస్థ సైఫార్మా ప్రకారం.. భారత్‌కు గుణపాఠం చెప్పడానికి 10 రోజుల క్రితం చైనా భాష మాండరిన్, కాంటోనిస్‌లలో డార్క్ వెబ్‌లో మాట్లాడుతున్నట్లు కనుగొన్నారు. చైనా నుంచి సంభవించే అతిపెద్ద ముప్పు మీడియా సంస్థలకు ఉండొచ్చని నిపుణులు భావిస్తున్నారు. ఈ హ్యాకింగ్ గ్రూపుల్లో చైనా సైన్యానికి నేరుగా సంబంధం ఉన్న గోతిక్ పాండా, స్టోన్ పాండా ఉన్నాయి అని సైఫార్మా చైర్మన్, సీఈవో కుమార్ రితేష్ తెలిపారు. ఈ గ్రూపులు చైనా మిలిటరీ కోసం పనిచేస్తాయని, గతంలో అమెరికా, హాంకాంగ్ వారిని లక్ష్యంగా చేసుకున్నారని తెలిసిందని చెప్పారు.

2 మిలియన్ ఈ-మెయిల్‌లు లక్ష్యం

మీడియా నివేదికల ప్రకారం, ఈ సైబర్ దాడి ncov2019.gov.in ఈ మెయిల్ నుంచి దాడికి దారితీయవచ్చు. ఈ ఈ మెయిల్ యొక్క విషయం ఉచిత కొవిడ్-19 పరీక్షలుగా ఉండొచ్చు. అందువల్ల ఈ ఈ మెయిల్ నుంచి మెయిల్ వచ్చినా లేదా అటా‌చ్‌మెంట్లను తెరవవద్దని ఈ మెయిల్ వినియోగదారులను హెచ్చరించారు. అలాగే, గుర్తుతెలియని వ్యక్తులు పంపే ఈ మెయిల్‌లను కూడా తెరవవద్దని సూచిస్తున్నారు. రెండు మిలియన్ల మంది భారతీయులకు చెందిన ఈ మెయిల్ ఖాతాలను చైనా హ్యాకర్లు లక్ష్యంగా చేసుకొన్నట్టు తెలుస్తున్నది. ఇటీవల, ఆస్ట్రేలియాలో ఇలాంటి సైబర్ దాడి జరిగిందని నిపుణులు గుర్తుచేస్తున్నారు.

చైనా వద్ద భారీగా సైబర్ సైన్యం

చైనాకు సొంతంగా సైబర్ సైన్యం ఉంది. ఇందులో 3 లక్షలకు పైగా నిపుణులు ఉన్నారు. ఈ రోజుల్లో సైబర్ దాడులు శక్తివంతమైన దేశాలలో సర్వసాధారణం అయ్యాయి. యుద్ధభూమిలో దేశాలు ఒకదానికొకటి ప్రవేశించటానికి ఇష్టపడనప్పుడు, వారు ఒకరిపై ఒకరు సైబర్ దాడులకు దిగుతున్నట్లుగా తెలుస్తున్నది. ఈ విషయంలో చైనా ముందంజలో ఉంది. 


logo