ఒట్టావా: కెనడాలో వందేళ్ల క్రితం నిర్మించిన రెండు చర్చిలను నిప్పుపెట్టి కాల్చేశారు. బ్రిటీష్ కొలంబియా ప్రాంతంలో జరిగిన ఈ ఘటన పట్ల పోలీసులు అనుమానాలు వ్యక్తం చేస్తున్నారు. సాక్రెడ్ హార్ట్ చర్చ్, సెయింట్ జార్జ్ చర్చిలు మంటల్లో పూర్తిగా దగ్ధం అయ్యాయి. సోమవారం ఉదయం ఈ ఘటన జరిగింది. అయితే జాతీయ స్థానిక తెగ ప్రజల దినోత్సవం రోజున ఈ ఘటన జరగడం శోచనీయం. అగ్నికి ఆహుతి అయిన ఆ రెండు చర్చిలను వందేళ్ల క్రితం నిర్మించినట్లు అధికారులు చెప్పారు. ఇటీవలే కామ్లూప్స్లో ఓ సామూహిక శ్మశాన వాటిక నుంచి సుమారు 215 మంది చిన్నారుల కళేబరాలను వెలికి తీసిన విషయం తెలిసిందే. ఆ ప్రాంతానికి వంద కిలోమీటర్ల దూరంలోనే ఈ రెండు చర్చిలు ఉన్నాయి. 19, 20వ శతాబ్ధాల్లో వేలాది మంది స్థానిక తెగల చిన్నారులను ఆ చర్చిలకు పంపేవాళ్లు. రోమన్ క్యాథలిక్లు ఆ చర్చిలను నిర్వహిస్తుండేవారు. చర్చిలు తగలబడిన ఘటనపై దర్యాప్తు చేస్తున్నట్లు ఫైర్ డిపార్ట్మెంట్ అధికారులు చెప్పారు.