ఆమ్స్టర్డామ్ : పలు దేశాలకు విస్తరిస్తున్న కరోనా వైరస్ డెల్టా వేరియంట్ నియంత్రణపై వైద్య నిపుణులు, శాస్త్రవేత్తలు కసరత్తు సాగిస్తున్నారు. వేగంగా విస్తరిస్తున్న డెల్టా వేరియంట్ నుంచి కొవిడ్ వ్యాక్సిన్ రెండు డోసులు తీసుకుంటే రక్షణ పొందవచ్చని ఆధారాలు లభించాయని ఐరోపా ఔషధ ఏజెన్సీ (ఈఎంఏ) గురువారం పేర్కొంది. డెల్టా వేరియంట్తో యూరప్లో తదుపరి వేవ్ ఉంటుందని డబ్ల్యూహెచ్ఓ హెచ్చరించిన క్రమంలో ఈఎంఏ ఈ అంచనాతో ముందుకు వచ్చింది.
డెల్టా వేరియంట్ ముప్పుపై తాము పరిశీలిస్తున్నామని, యూరప్లో ప్రస్తుతం అందుబాటులో ఉన్న నాలుగు కరోనా వ్యాక్సిన్లు డెల్టా సహా యూరప్లో వ్యాప్తిలో ఉన్న అన్ని స్ట్రెయిన్ల నుంచి రక్షణ కల్పించేలా కనిపిస్తున్నాయని ఈఎంఏ వ్యాక్సిన్ స్ట్రేటజీ హెడ్ మార్కో కవలెరి పేర్కొన్నారు.
క్షేత్రస్ధాయిలో వస్తున్న ఆధారాల మేరకు రెండు డోసుల వ్యాక్సిన్ తీసుకుంటే డెల్టా వేరియంట్ నుంచి రక్షణ లభిస్తుందని వెల్లడైందని చెప్పారు. వ్యాక్సిన్లతో వచ్చిన యాంటీ బాడీలు డెల్టాను తటస్ధీకరించే సామర్ధ్యం కలిగిఉన్నాయని ల్యాబ్ పరీక్షల్లోనూ తేలిందని తెలిపారు. ప్రస్తుతం యూరప్లో ఫైజర్, మోడెర్నా, ఆస్ట్రాజెనెకా, జాన్సన్ అండ్ జాన్సన్ అభివృద్ధి చేసిన నాలుగు కరోనా వ్యాక్సిన్లకు ఆమోదం లభించింది.