న్యూఢిల్లీ, మే 10: యాంటీ పారసైటిక్ ఔషధం ‘ఐవర్మెక్టిన్’ను క్రమం తప్పకుండా వాడటం వల్ల కరోనాను కట్టడి చేయవచ్చన్న వార్తలను ప్రపంచ ఆరోగ్య సంస్థ (డబ్ల్యూహెచ్వో) తోసిపుచ్చింది. క్లినికల్ ట్రయల్స్ కోసం మినహా ఈ ఔషధాన్ని వాడొద్దని సూచించింది. ఈ మేరకు డబ్ల్యూహెచ్వో చీఫ్ సైంటిస్ట్ సౌమ్యా స్వామినాథన్ మంగళవారం ట్వీట్ చేశారు. ‘ఏదైనా ఔషధాన్ని వాడుతున్నామంటే రక్షణ, సమర్థత అనేది ముఖ్యం. క్లినికల్ ట్రయల్స్ మినహాయించి కొవిడ్-19 చికిత్సకు ‘ఐవర్మెక్టిన్’ను వాడొద్దు’ అని ఆమె ట్వీట్లో పేర్కొన్నారు. కాగా ‘ఐవర్మెక్టిన్’ను తరుచూ వినియోగించడం వల్ల కొవిడ్-19 బారిన పడే ప్రమాదం గణనీయంగా తగ్గించవచ్చని అమెరికాకు చెందిన ఫ్రంట్లైన్ కొవిడ్-19 క్రిటికల్ కేర్ అలియన్స్ (ఎఫ్ఎల్సీసీసీ) పరిశోధకులు సోమవారం పేర్కొనడం తెలిసిందే. ‘ఐవర్మెక్టిన్’ వాడటం ద్వారా కరోనాని సమూలంగా అంతం చేయవచ్చని వాళ్లు తెలిపారు. దీంతో 18 ఏండ్లు దాటిన వారందరూ ‘ఐవర్మెక్టిన్’ వాడొచ్చని గోవా సర్కార్ సోమవారం సూచించింది. ఈ డ్రగ్ను వైద్య కేంద్రాల్లో అందుబాటులో ఉంచుతామన్నది.