శుక్రవారం 27 నవంబర్ 2020
International - Nov 11, 2020 , 01:33:26

విజయం మాదే!

విజయం మాదే!

  • మరోసారి డొనాల్డ్‌ ట్రంప్‌ ట్వీట్‌
  • ఓటమిని అంగీకరించకుండా మంకుపట్టు
  • అధికార మార్పిడికి అడ్డంకులు
  • రక్షణ మంత్రి ఎస్పర్‌కు ఉద్వాసన

వాషింగ్టన్‌, నవంబర్‌ 10: అమెరికా అధ్యక్షుడు డొనాల్డ్‌ ట్రంప్‌ మంకుపట్టు వీడడం లేదు. అధ్యక్ష ఎన్నికల్లో ఓటమిని అంగీకరించడం లేదు. పైగా, ఎన్నికల్లో తామే విజయం సాధిస్తామంటూ తాజాగా మరోసారి ఆయన ట్వీట్‌చేశారు. ‘మేం మంచి పురోగతి సాధిస్తున్నాం. వచ్చే వారం నుంచి ఫలితాలు వస్తాయి. అమెరికాను మళ్లీ గొప్పగా మారుద్దాం’ అని ట్వీట్‌లో పేర్కొన్నారు. ఈ నెల 3న జరిగిన ఎన్నికల్లో డెమోక్రటిక్‌ అభ్యర్థి జో బైడెన్‌ విజయం సాధించిన విషయం తెలిసిందే. ఓ వైపు బైడెన్‌ ప్రభుత్వ ఏర్పాటుపై కసరత్తు చేస్తుండగా, మరోవైపు ట్రంప్‌ శిబిరం మాత్రం ఎన్నికలు ఇంకా ముగియలేదని పేర్కొంటున్నది. నిజాయితీగా ఓట్ల లెక్కింపు చేపట్టేందుకు తమ ముందున్న అన్ని అవకాశాలను వినియోగించుకుంటామని చెబుతున్నది. అలాగే అధికార మార్పిడికి కూడా ట్రంప్‌ యంత్రాంగం సహకరించడం లేదు. కౌంటింగ్‌లో అక్రమాలపై విచారణ చేపట్టేందుకు న్యాయ విభాగానికి అటార్నీ జనరల్‌ విలియం బార్‌ అనుమతినిచ్చారు. కాగా, రక్షణమంత్రి మార్క్‌ ఎస్పర్‌కు ట్రంప్‌ ఉద్వాసన పలికారు.

కావాలనే ఆ విషయాన్ని దాచిపెట్టారు

ఫైజర్‌ వ్యాక్సిన్‌ సమర్థంగా పనిచేస్తుందన్న విషయాన్ని కావాలనే దాచిపెట్టారని ఫైజర్‌, ఫుడ్‌ అండ్‌ డ్రగ్‌ అడ్మినిస్ట్రేషన్‌పై(ఎఫ్‌డీఏ) ట్రంప్‌ విమర్శలు గుప్పించారు. ఎన్నికల్లో తనకు ప్రయోజనం చేకూర్చకూడదనే ఉద్దేశంతోనే ఎన్నికలకు ముందు ఆ విషయాన్ని ప్రకటించలేదని మండిపడ్డారు. ఒకవేళ బైడెన్‌ అధ్యక్షుడిగా ఉండుంటే మరో నాలుగేండ్లయినా వ్యాక్సిన్‌ వచ్చుండేది కాదని ఆరోపించారు. ఎఫ్‌డీఏ వేగంగా అనుమతులు ఇచ్చేది కాదని, లక్షల మంది ప్రాణాలు కోల్పోయేవారని పేర్కొన్నారు. 

మీడియాను దూరంగా ఉంచాలి

ఎన్నికల ప్రక్రియలో జోక్యం చేసుకోకుండా మీడియాను దూరంగా ఉంచాలని ట్రంప్‌ పేర్కొన్నారు. ప్రధాన మీడియా సంస్థల అంచనాలన్నీ  తప్పులతడకగా ఉన్నాయని ఆరోపించారు. ప్రజలను తప్పుదోవ పట్టించారని, అలాగే నిధుల సేకరణ సైతం ప్రభావితమైందని చెప్పారు. ఎన్నికలకు ముందు విస్కాన్సిన్‌లో తాను 17 పాయింట్లు వెనుకబడినట్లు పేర్కొన్నారని, కానీ తాను అక్కడ విజయం సాధించినట్లు చెప్పారు. అలాగే అయోవాలోనూ తాను వెనుకంజలో ఉన్నట్లు అంచనావేశారని, అక్కడ 8.2 పాయింట్లతో తాను గెలుపొందినట్లు తెలిపారు.

అమెరికా చరిత్రలో నూతన అధ్యాయం: కమల

అమెరికా అధ్యక్షుడిగా బైడెన్‌ ప్రమాణం చేసిన తొలిరోజే మధ్యతరగతి ప్రజల ఆశలు నెరవేర్చేలా దేశ చరిత్రలో నూతన అధ్యాయానికి నాంది పలుకుతారని ఉపాధ్యక్షురాలిగా ఎన్నికైన కమలాహ్యారిస్‌  పేర్కొన్నారు. అమెరికా ఆర్థిక రంగాన్ని బలోపేతం చేసి వాటి ఫలాలను దేశ అభివృద్ధి కోసం అహర్నిశలు కృషిచేస్తున్న ప్రజలకు అందేలా తమ ప్రభుత్వం ప్రణాళికలు అమలుచేస్తుందని ట్వీట్‌ చేశారు. కరోనా మహమ్మారిని కట్టడి చేయడం, ఆర్థిక రంగానికి ఊతమివ్వడం, జాతివివక్షను రూపుమాపడంతోపాటు వాతావరణ మార్పులు తమ ప్రభుత్వ ప్రథమ ప్రాధాన్యత అంశాలని  బైడెన్‌ టీమ్‌ ఇప్పటికే తమ అధికారిక వెబ్‌సైట్‌లో ప్రకటించింది. మధ్య తరగతి ప్రజలకు లబ్ధి చేకూర్చేందుకు తమ ప్రభుత్వం కీలక నిర్ణయాలు తీసుకుంటుందని పేర్కొంది.