క్రొయేషియాలో భూకంపం.. ఏడుగురు మృతి

జాగ్రెబ్‌ (క్రొయేషియా) : సెంట్రల్ క్రొయేషియాలో మంగళవారం 6.4 రిక్టర్‌ స్కేలుపై తీవ్రతతో భూకంపం సంభవించింది. దీంతో పెద్ద ఎత్తున భవనాలు ధ్వంసమయ్యాయి. భూకంపంతో కనీసం ఏడుగురు మరణించగా.. డజన్ల కొద్దీ గాయపడ్డారని యూఎస్‌ జియోలాజికల్ సర్వే, క్రొయేషియన్ అధికారులు తెలిపారు. అలాగేపెద్ద ఎత్తున ఆస్తి నష్టం జరిగింది. మిలిటరీ సహాయంతో అత్యవసర సిబ్బంది సహాయక చర్యలు చేపడుతున్నారు. విద్యుత్‌ సరఫరా నిలిచిపోవడంతో ఇబ్బందులు ఎదురయ్యాయి. క్రొయేషియా రాజధాని జాగ్రెబ్‌కు ఆగ్నేయంగా 30 మైళ్ల దూరంలో స్థానిక సమయం మధ్యాహ్నం తర్వాత ప్రకంపనలు వచ్చాయి. ఈ ఏడాది క్రొయేషియాలో సంభవించిన అతిపెద్ద భూకంపం ఇదేనని యూరోపియన్-మెడిటరేనియన్ సీస్మోలాజికల్ సెంటర్ తెలిపింది. ఇదిలా ఉండగా.. మృతుల సంఖ్య పెరిగే అవకాశం ఉందని ఆ దేశ ప్రధానమంత్రి ఆండ్రేజ్‌ ప్లెన్‌కోవిక్‌ అన్నారు. పెట్రింజా పట్టణానికి వెళ్లొద్దని పౌరులకు విజ్ఞప్తి చేశారు. పెట్రింజా పట్టణంలో ఓ చిన్నారితో పాటు.. షినా గ్రామంలో చర్చిలో ఓ వ్యక్తి, మజ్స్కే పోల్జనే గ్రామంలో ఐదుగురు వ్యక్తులు చనిపోయారని క్రొయేషియా అంతర్గత వ్యవహారాల శాఖ తెలిపింది.