బుధవారం 23 సెప్టెంబర్ 2020
International - Sep 08, 2020 , 15:40:00

క‌రోనా ఆఖ‌రి మ‌హ‌మ్మారి కాదు: WHO

క‌రోనా ఆఖ‌రి మ‌హ‌మ్మారి కాదు: WHO

జెనీవా: కరోనా వైరస్‌ ప్రపంచ దేశాలను ఉక్కిరిబిక్కిరి చేస్తున్న‌ది. వైర‌స్ క‌ట్ట‌డి కోసం అన్ని దేశాలు లాక్‌డౌన్‌లోకి వెళ్ల‌డంతో ఆర్థిక సంక్షోభాల‌ను ఎదుర్కొంటున్నాయి. ఈ క‌ష్టాల నుంచి గ‌ట్టెక్కేందుకు ప్ర‌య‌త్నాలు కొన‌సాగిస్తూనే ఉన్నాయి. ఈ నేప‌థ్యంలో ప్రపంచ ఆరోగ్య సంస్థ మరో హెచ్చరిక చేసింది. క‌రోనా వైర‌స్ లక్షల మంది ప్రాణాలు తీసుకుంటున్నద‌ని, ఇదే చివరి మ‌హ‌మ్మారి కాదని, భ‌విష్య‌త్తులో మ‌రిన్ని ఉత్పాతాలు త‌ప్ప‌వ‌ని ప్రపంచ ఆరోగ్య సంస్థ (WHO) డైరెక్టర్‌ జనరల్‌ టెడ్రోస్‌ అధనోమ్ గెబ్రియేసస్‌ హెచ్చరించారు. 

'వైరస్‌ ఉత్పాతాలు, మహమ్మారి విజృంభణలు నిజ జీవితంలో ఎప్పుడూ తప్పవనే విష‌యాన్ని చరిత్ర స్పష్టం చేస్తున్న‌ద‌ని, రాబోయే మహమ్మారులను ఎదుర్కొనేందుకు ప్రస్తుతానికంటే మరింత సంసిద్ధంగా ఉండాలని ఆయ‌న సూచించారు. ప్రజారోగ్యంపై ప్రభుత్వాలు భారీగా ఖర్చుచేయాల్సిన అవసరం ఉన్న‌ద‌ని WHO డైరెక్టర్‌ జనరల్‌ స్పష్టంచేశారు. 

స్పానిష్‌ ఫ్లూ మొదలు సార్స్‌, మెర్స్‌, ఎబోలా, స్వైన్‌ఫ్లూ వంటి ఎన్నో వైరస్‌లు విజృంభిస్తూ మానవాళికి సవాల్‌ విసురుతూనే ఉన్నాయ‌ని, కేవలం కరోనా వైరస్‌తోనే ప్రమాదం ముగిసిపోలేదని, రానున్న రోజుల్లో మరిన్ని మహమ్మారులను ఎదుర్కొనేందుకు ప్రపంచ దేశాలు అప్రమత్తంగా, మరింత సన్నద్ధతతో ఉండాలని WHO సూచించింది. 

అదేవిధంగా కేవలం ఏ ఒక్క దేశమో వ్యాక్సిన్‌ పంపిణీ చేపట్టినంత మాత్రాన మహమ్మారిని అరికట్టలేమని WHO అభిప్రాయపడింది. దేశాలన్నీ అనుసంధానమై ఉన్న ప్రపంచంలో, స్వల్ప ఆదాయ దేశాల ప్రజలకు వ్యాక్సిన్‌ అందకపోతే అది మరింత విస్తరించే ప్రమాదం ఉంటుందని WHO హెచ్చ‌రించింది. అందుకే ప్రతి దేశానికి వ్యాక్సిన్‌ అందించడం ఎంతో కీలకమని తెలిపింది. 

కాగా, కరోనా వ్యాక్సిన్‌ అన్ని దేశాలకు సమానంగా అందేలా 'కొవ్యాక్స్‌' కార్యక్రమాన్ని చేపట్టింది. తద్వారా టీకా తయారుచేసుకోలేని, కొనలేని దాదాపు 100 దిగువ, మధ్యతరగతి దేశాలకు వ్యాక్సిన్‌ అందించేందుకు ప్రయత్నాలు చేస్తున్న‌ది. ఈ కార్యక్రమంలో భారత్‌ను భాగస్వామిగా చేర్చుకునేందుకు WHO ఇప్పటికే చర్చలు జరుపుతున్న‌ది. అయితే, అమెరికా మాత్రం ఈ కార్యక్రమంలో చేరబోమని ఇప్ప‌టికే ప్ర‌క‌టించింది. 

లోక‌ల్ టు గ్లోబ‌ల్‌.. వార్త ఏదైనా.. అన్నీ ఒకే యాప్‌లో. న‌మ‌స్తే తెలంగాణ ఆండ్రాయిడ్ యాప్ డౌన్‌లోడ్ చేసుకోండి.


logo