కాబూల్: ఆప్ఘనిస్థాన్ మరోసారి తాలిబన్ల వశం కావడంతో ఆ దేశ మహిళలు బిక్కుబిక్కుమంటున్నారు. ఇటీవల దేశం వీడిన కొందరు మహిళలు కాబూల్ ఎయిర్పోర్ట్ బయట బలవంతపు వివాహాలు చేసుకోవాల్సి వచ్చింది. అమెరికా సైనిక విమానాల్లో వెళ్లేందుకు ఆఫ్ఘన్ మహిళలకు కొన్ని నిబంధనలు అడ్డంకిగా మారాయి. మగ కుటుంబ సభ్యుల తోడు లేకుండా మహిళలు విమానాల్లో ప్రయాణించడాన్ని తాలిబన్లు నిషేధించారు.
ఈ నేపథ్యంలో ఒంటరి మహిళలు కాబూల్ ఎయిర్పోర్ట్ బయటే ఆ దేశం వీడే మగవారితో ఒప్పందపు వివాహాలు చేసుకున్నారు. ఆఫ్ఘన్ వీడేందుకు అర్హత ఉన్న పురుషులు భర్తలుగా నటించేందుకు మహిళల కుటుంబాలు డబ్బులు కూడా చెల్లించినట్లు సీఎన్ఎన్ వార్తా సంస్థ పేర్కొంది. ఆఫ్ఘనిస్థాన్ నుంచి అమెరికా విమానాల్లో యూఏఈకి చేరిన పలువురు మహిళలు ఇలాంటి బలవంతపు లేదా ఒప్పంద వివాహాలు చేసుకున్నారని తెలిపింది.
కాగా, ఈ విధానంపై అమెరికా అధికారులు ఆందోళన వ్యక్తం చేసినట్లు సీఎన్ఎన్ వెల్లడించింది. మరోవైపు ఈ ముసుగులో ఆఫ్ఘన్ మహిళల అక్రమ రవాణాను గుర్తించేందుకు యూఏఈ అధికారులకు అమెరికా ప్రతినిధులు సహకరించనున్నారని పేర్కొంది.