సిటీబ్యూరో, సెప్టెంబర్ 28(నమస్తే తెలంగాణ): హృదయం మన పిడికిలంతే.. అయినా నిరంతర స్పందనలతో మన ప్రాణాలను నిలబెడుతుంది. ‘మంచి’ రక్తాన్ని అవయవాలకు పంపిస్తూ మన గమనంలో కీలక పాత్ర పోషిస్తుంది. అలాంటి గుండె.. ఇప్పుడు అలిసిపోతుంది. చిన్నారుల నుంచి వృద్ధుల వరకు ఎంతో మంది గుండె సంబంధిత సమస్యలతో బాధపడుతున్నారు. ఇటీవల యువకుల్లో గుండెపోటు మరణాలు ఎక్కువయ్యాయి. దీనికి కారణం మారుతున్న జీవన శైలియే అని వైద్యులు చెబుతున్నారు. సరైన వ్యాయామం లేకపోవడమే ప్రధాన కారణంగా భావిస్తున్నారు. ముందస్తు అప్రమత్తత.. సరైన వ్యాయామంతో గుండె మరణాలను 80 శాతం తగ్గించొచ్చని పలు అధ్యయనాలు వెల్లడిస్తున్నాయి. నేడు వరల్డ్ హార్ట్ డే సందర్భంగా నగరంలో భారీ ఎత్తున హైదరాబాద్ సైక్లిస్టులు 5కే సైక్లింగ్, 3కే రన్ ఈవెంట్స్ నిర్వహిస్తున్నారు. ‘చిట్టి గుండెను కాపాడుకుందాం’ అంటూ అవగాహన కల్పించడానికి సిద్ధమయ్యారు.
పొగ అలవాటు, మధుమేహం, అధిక రక్తపోటు, అధిక కొలెస్ట్రాల్, ఊబకాయం, గాలి కాలుష్యం వంటి కారణాలతో జనం గుండె జబ్బుల బారినపడుతున్నారు. ప్రధానంగా పొగ తాగే అలవాటు చిన్న పిల్లల్లో ఉంటే వారికి గుండె పోటు వచ్చే ప్రమాదం ఎక్కువగా ఉంటుంది. ధూమపానం గుండెకు సంబంధించిన ప్రమాదాన్ని 8 రెట్ల పెంచుతుందని వైద్యులు హెచ్చరిస్తున్నారు. అధిక కొలెస్ట్రాల్ కూడా గుండె జబ్బులకు ప్రధానం కారణం. తక్కువ సాంద్రత కలిగిన లిపో ప్రొటీన్ లేదా చెడు ఎల్డీఎల్ కొలెస్ట్రాల్ గుండె జబ్బులకు దారి తీస్తుంది. 250 మందిలో ఒకరికి ఎఫ్హెచ్ ఉంటుందని వైద్యులు చెబుతున్నారు. ఎఫ్హెచ్ ఉన్న పురుషులలో సగం మందికి 50 ఏళ్లు రాక ముందే గుండెపోటు సమస్యలు తలెత్తుతాయి. మహిళల్లో 30 శాతం మందికి 60 ఏళ్లు వచ్చేలోపు గుండెపోటు వస్తుంది. ప్రపంచ వ్యాప్తంగా ఏటా 1.90 కోట్ల మంది హృదయ సంబంధిత వ్యాధులతో మరణిస్తున్నారు. ఇలాంటి పరిస్థితుల్లో ప్రతి ఒక్కరూ హృదయానికి సంబంధించిన ఏ ఒక్క విషయలోనూ నిర్లక్ష్యం చేయొద్దని వైద్యులు సూచిస్తున్నారు.