e-Paper

Advertisement

E-Paper

Apps

Book Your Copy

Visit Telangana Today

Friday, September 17, 2021
Home హైదరాబాద్‌ వ్యర్థాన్ని కరిగించి స్వచ్ఛత నింపి..

వ్యర్థాన్ని కరిగించి స్వచ్ఛత నింపి..

  • అందమైన నగరంగా తీర్చిదిద్దే క్రమంలో ‘వావ్‌’ అనిపిస్తున్న తెలంగాణ
  • ఫతుల్లాగూడలో భవన నిర్మాణ, కూల్చివేత, తవ్వకాల వ్యర్థాల
  • జవహర్‌నగర్‌ డంపింగ్‌ యార్డులో 40 మెగావాట్ల విద్యుత్‌ ప్లాంట్లు
  • సీ అండ్‌ డీ ప్లాంట్లలో భవన వ్యర్థాలతో రోజుకు లక్షల విలువైన నిర్మాణ సామగ్రి ఉత్పత్తి

అధునాతన సాంకేతిక పరిజ్ఞానం, విధానాల అమలుతో వ్యర్థాల నుంచి సంపద (వెల్త్‌ ఆఫ్‌ వేస్ట్‌)ను సృష్టించడంలో తెలంగాణ ప్రభుత్వం దూసుకుపోతుంది. నాగోల్‌లోని ఫతుల్లాగూడలో రాష్ట్ర ఐటీ, పురపాలక శాఖ మంత్రి కేటీఆర్‌ భవన నిర్మాణ వ్యర్థాల రీసైక్లింగ్‌ ప్లాంట్‌ను ప్రారంభించిన సందర్భంగా గ్రేటర్‌ హైదరాబాద్‌ పారిశుధ్య నిర్వహణలో వచ్చిన విప్లవాత్మక మార్పులను ఆసక్తికరంగా వివరించారు. ప్రభుత్వం అమలు చేస్తున్న విధానాలతో నాగరిక-పర్యావరణహితంగా బహుముఖ ప్రయోజనాలు ఎలా ఉన్నాయనేది గతంతో పోలుస్తూ చెప్పారు. ఆ వివరాలను పరిశీలిస్తే..

హైదరాబాద్‌, జూన్‌ 25 (నమస్తేతెలంగాణ): రాష్ట్రవ్యాప్తంగా భవన నిర్మాణ వ్యర్థాల రీసైక్లింగ్‌ ప్లాంట్లను ఏర్పాటుచేసేందుకు ప్రణాళిక సిద్ధం చేస్తున్నట్టు ఐటీ, పురపాలకశాఖ మంత్రి కేటీఆర్‌ పేర్కొన్నారు. జీహెచ్‌ఎంసీ, రాంకీ సంస్థ సంయుక్తంగా నాగోల్‌లోని ఫతుల్లాగూడలో ఏర్పాటుచేసిన భవననిర్మాణ వ్యర్థాల రీసైక్లింగ్‌ ప్లాంట్‌ను శుక్రవారం మంత్రి కేటీఆర్‌ ప్రారంభించారు. ఈ సందర్భంగా ఆయన మాట్లాడుతూ.. టన్ను వ్యర్థాల తరలింపునకు నామమాత్రంగా రూ.342 చెల్లించాల్సి ఉంటుందని తెలిపారు. టోల్‌ఫ్రీ నంబర్‌కు ఫోన్‌చేస్తే సిబ్బంది వచ్చి తీసుకెళ్తారని చెప్పారు. సొంత వాహనంతో వ్యర్థాలను ఫతుల్లాగూడ ప్లాంట్‌కు తీసుకొస్తే టన్నుకు రూ.85.5 చెల్లించాల్సి ఉంటుందని వివరించారు. జీహెచ్‌ఎంసీ పరిధిలో ఇప్పటికే ప్రారంభించిన జీడిమెట్ల, ఫతుల్లాగూడలో భవన నిర్మాణ వ్యర్థాల రీసైక్లింగ్‌ప్లాంట్‌తో పాటు మరో రెండు వ్యర్థాల నిర్వహణ ప్లాంట్లు ఏర్పాటుచేస్తున్నట్లు చెప్పారు. సమగ్ర ప్రణాళికతో వ్యర్థాల నిర్వహణ చేపడుతున్నట్టు తెలిపారు. ఢిల్లీ, అహ్మదాబాద్‌ తర్వాత హైదరాబాద్‌లోనే సీ అండ్‌ డీ(కన్‌స్ట్రక్షన్‌ అండ్‌ డిమోలిషన్‌) ప్లాంటులు ఉన్నాయని చెప్పారు.

వ్యర్థాలతో కొత్త ఉత్పత్తులు

- Advertisement -

రీసైక్లింగ్‌ ద్వారా వచ్చే మెటీరియల్‌ను ఫుట్‌పాత్‌, రోడ్డు సబ్‌బేస్‌ల నిర్మాణాలకు ఉపయోగించుకొవచ్చని మంత్రి కేటీఆర్‌ తెలిపారు. పేవర్‌ బ్లాక్స్‌, పార్కింగ్‌ టైల్స్‌, కెర్బ్‌స్టోన్స్‌, ప్రీకాస్ట్‌ కాంపౌండ్‌ వాల్స్‌ తయారు చేయవచ్చని అన్నారు. జీహెచ్‌ఎంసీ ఏప్రిల్‌ 2018 నుంచి ఇప్పటి వరకు 15.26 లక్షల టన్నుల వ్యర్థాలను సేకరించిందని చెప్పారు. కార్యక్రమంలో ఎల్బీనగర్‌ ఎమ్మెల్యే దేవిరెడ్డి సుధీర్‌రెడ్డి, ఎమ్మెల్సీలు యెగ్గే మల్లేశం, బొగ్గారపు దయానంద్‌, టూరిజం కార్పొరేషన్‌ చైర్మన్‌ ఉప్పల శ్రీనివాసగుప్తా, జీహెచ్‌ఎంసీ డిప్యూటీ మేయర్‌ శ్రీలతారెడ్డి, రాంకీ గ్రూప్‌ ఎండీ గౌతమ్‌రెడ్డి తదితరులు పాల్గొన్నారు.

వ్యర్థాల తరలింపునకు టోల్‌ ఫ్రీ నంబర్‌

హైదరాబాద్‌ మాదిరిగా వరంగల్‌, ఇతర పట్టణాల్లో క్లస్టర్ల తరహాలో భవన నిర్మాణ వ్యర్థాల నిర్వహణ ప్లాంట్లను ఏర్పాటుచేయనున్నట్టు మంత్రి కేటీఆర్‌ తెలిపారు. వ్యర్థాల తరలింపునకు టోల్‌ ఫ్రీనంబర్‌ 18001201159 అందుబాటులోకి తెచ్చామని అన్నారు. జీడిమెట్ల ప్లాంట్‌లో రోజుకు 500 టన్నుల నిర్మాణ వ్యర్థాల రీసైక్లింగ్‌ చేస్తున్నట్టు పేర్కొన్నారు. ఫతుల్లాగూడ ప్లాంట్‌లో కూడా రోజుకు 500 టన్నుల నిర్మాణ వ్యర్థాల పునర్వినియోగం జరుగుతుందని తెలిపారు. హైదరాబాద్‌లో రోజుకు 2 వేల టన్నుల వ్యర్థాలను పునర్వినియోగించేలా చర్యలు తీసుకుంటున్నామని చెప్పారు. నిర్మాణ వ్యర్థాలలో 90 శాతం మళ్లీ ఉపయోగంలోకి వస్తుందని చెప్పారు. ప్రజాప్రతినిధులకు, బిల్డర్లకు వీటిపై అవగాహన కల్పించాలని అధికారులకు సూచించారు. ఎల్‌బీనగర్‌లో రూ.450 కోట్లతో ఎస్సార్డీపీ పనులు కొనసాగుతున్నాయని, రూ.858 కోట్లతో ఎస్‌ఎన్‌డీపీ పనులను చేపడుతున్నామని వివరించారు. చెత్త నుంచి 20 మెగావాట్ల విద్యుత్‌ ఉత్పత్తి చేసేందుకు వీలుగా ప్లాంట్‌ ఏర్పాటుచేసినట్టు చెప్పారు. మరో 28 మెగావాట్ల ప్లాంట్‌ను ఏర్పాటు చేయబోతున్నట్లు పేర్కొన్నారు. పొడి చెత్త నుంచి విద్యుత్‌ ఉత్పత్తి, తడి చెత్త నుంచి ఎరువు తయారీకి చర్యలు తీసుకుంటున్నామని వివరించారు.

గతంలో చెత్త నిర్వహణ…

  • నగరంలో రోజుకు 3500 టన్నుల చెత్తను సేకరించేవారు. వాస్తవంగా ఉత్పత్తి అయ్యే చెత్త పరిమాణంలో ఈ సేకరణ ఉండేది కాదు.
  • ఇళ్లలో సేకరించిన చెత్త డొక్కు వాహనాల్లో తరలించడం వల్ల వీధులు, రోడ్లపైనే పడేది. ఆ దారంతా దుర్గంధం వ్యాపించేది.
  • నగరంలో కేవలం 17 చెత్త ట్రాన్స్‌ఫర్‌ స్టేషన్లు మాత్రమే ఉండేవి. దీంతో ఇళ్ల నుంచి చెత్తను సేకరించిన ఆటోలు 8-12 కిలోమీటర్ల దూరంలోని ట్రాన్స్‌ఫర్‌ స్టేషన్‌కు వెళ్లాల్సి వచ్చేది. రోజులో 2-3 ట్రిప్పుల కంటే ఎక్కువ నడిపేవారు కాదు.
  • ట్రాన్స్‌ఫర్‌ స్టేషన్ల నుంచి జవహర్‌నగర్‌ డంపింగ్‌ యార్డుకు చెత్త తరలించడమనేది మరో పెద్ద సవాల్‌.
  • జవహర్‌నగర్‌ డంపింగ్‌ యార్డులో పేరుకుపోయిన భారీ చెత్త గుట్టలను అలాగే వదిలేయడంతో పరిసర ప్రాంతాల్లో దుర్గంధం. భూగర్భ జలాలు కలుషితమై, చుట్టుపక్కల ప్రాంతాల ప్రజలు నరకయాతన అనుభవించేవారు.

మరి… ఇప్పుడు?!

  • నగరంలో ప్రతి ఇంటి నుంచి తడి, పొడి చెత్తను వేర్వేరుగా సేకరించడంలో పక్కాగా చేపట్టడంతో రోజుకు ఏడువేల టన్నులు (గతంలో కంటే రెట్టింపు) సేకరిస్తున్నారు.
  • గతంలో కేవలం 17 మాత్రమే ఉండే ట్రాన్స్‌ఫర్‌ స్టేషన్ల సంఖ్యను ఇప్పుడు 70కి పెంచారు. మున్ముందు వాటిని వందకు పైగా పెంచనున్నారు. దీంతో ప్రతి ఇంటి నుంచి చెత్తను సేకరించే స్వచ్ఛ ఆటోలకు కేవలం 3-5 కిలోమీటర్ల పరిధిలోనే ట్రాన్స్‌ఫర్‌ స్టేషన్లు అందుబాటులోకి వచ్చాయి.
  • ట్రాన్స్‌ఫర్‌ స్టేషన్ల నుంచి ప్రధాన డంపింగ్‌ యార్డుకు చెత్త తరలింపులో అధునాతన వాహనాలు (క్లోజ్డ్‌ కంటెయినర్స్‌) వినియోగిస్తుండటంతో ఎలాంటి దుర్గంధం, రోడ్లపై చెత్త పడే పరిస్థితి లేదు. ప్రస్తుతం, గ్రేటర్‌ పరిధిలో ఇలాంటి అధునాతన వాహనాలు 90 ఉండగా… మున్ముందు మరింత పెంచనున్నారు.
  • జవహర్‌నగర్‌ డంపింగ్‌ యార్డులో పకడ్బందీ చర్యలు తీసుకోవడంతో పాటు పొడి చెత్త ద్వారా కరెంటు ఉత్పత్తి చేస్తున్నారు. ఇప్పటికే 20 మెగావాట్ల విద్యుత్‌ ప్లాంటు అందుబాటులోకి రాగా, మరో 20 మెగావాట్ల ప్లాంటు కూడా అందుబాటులోకి రానుంది. తడి చెత్త ద్వారా ఎరువును ఉత్పత్తి చేసి వాటిని వ్యవసాయానికి అందిస్తున్నారు.
  • భవన నిర్మాణ వ్యర్థాల తీరుతో అంతా సతమతం
  • గతంలో భవన నిర్మాణాల వ్యర్థాలను ఎక్కడ ఖాళీ స్థలం ఉంటే అక్కడ పడేసేవారు. క్రీడా మైదానాలు మొదలు చెరువులు, కుంటలు, కాల్వల్లో వేసేవారు.
  • తద్వారా చిన్నారులు ఆడుకునేందుకు క్రీడా మైదానాలు కరువు.
  • చెరువులు, కుంటల్లో వ్యర్థాలు పేరుకుపోవడంతో వర్షాకాలంలో వరద ఎటుపోవాలో తెలియక ఇండ్లను ముంచెత్తిన ఘటనలు అనేకం ఉన్నాయి. దీంతో నగరం అతలాకుతలమయ్యేది.

మరి ఇప్పుడు?!

  • భవన నిర్మాణ వ్యర్థాల ద్వారా సంపద సృష్టించడంలో భాగంగా సీ అండ్‌ డీ ప్లాంట్లను ఏర్పాటు చేస్తున్నారు. గతంలో జీడిమెట్ల, తాజాగా ఫతుల్లాగూడలో ఏర్పాటైన ప్లాంట్ల ద్వారా రోజుకు వెయ్యి టన్నుల వ్యర్థాలను రీసైక్లింగ్‌ చేస్తున్నారు. త్వరలో మరో రెండు ఏర్పాటు ద్వారా రీసైక్లింగ్‌ సామర్థ్యం రెండువేల టన్నులకు పెరగనుంది.
  • రీసైక్లింగ్‌లో భాగంగా వ్యర్థాల నుంచి నిర్మాణ సామగ్రి, పెద్ద, చిన్న సైజు కంకర, ఇసుక ఉత్పత్తి చేస్తున్నారు. ఈ సామగ్రిని భవనాలు, ఫ్లైఓవర్లు, ఇతర నిర్మాణాల్లో వినియోగిస్తున్నారు. టైల్స్‌ను కూడా తయారు చేస్తుండటంతో వాటిని ఫుట్‌పాత్‌లతో పాటు గృహాల్లోనూ వినియోగిస్తున్నారు.
  • ప్రధానంగా ఖాళీ స్థలాలు క్రీడా మైదానాలుగా అందుబాటులోకి వస్తున్నాయి.
  • చెరువులు, కుంటలు, కాల్వల్లో నిర్మాణ వ్యర్థాలు పడకపోవడంతో వరద సాఫీగా దిగువకు ప్రవహిస్తుంది.
Advertisement
-Advertisement-

తాజావార్తలు

Advertisement

ట్రెండింగ్‌

Advertisement
Namasthe Telangana