బంజారాహిల్స్ : అపార్ట్మెంట్కు సంబంధించిన కామన్ ఏరియాలో ఎలాంటి అనుమతులు లేకుండా నిర్మించిన షటర్లను జీహెచ్ఎంసీ టౌన్ప్లానింగ్ సిబ్బంది కూల్చేశారు. జూబ్లీహిల్స్ రోడ్ నెంబర్-10 లోని అనితా ఎన్క్లేవ్ అపార్ట్మెంట్కు చెందిన సెట్ బ్యాక్, కామన్ ఏరియాలో గత కొన్ని రోజులుగా అక్రమంగా నిర్మాణాలు చేపట్టారు.
ఈ విషయంపై టౌన్ప్లానింగ్ సిబ్బందికి ఫిర్యాదులు అందడంతో గతంలోనే కూల్చివేతలు చేపట్టారు. కాగా మూడు రోజుల క్రితం వరుస సెలవులు రావడంతో సదరు బిల్డర్లు షటర్ల నిర్మాణం చేపట్టారు. ఆగమేఘాల మీద నిర్మాణాలు పూర్తి చేసి రంగులు వేసుకున్నారు.
ఈ వ్యవహారంపై అపార్ట్మెంట్ వాసులు, స్థానికులు నగర మేయర్ గద్వాల్ విజయలక్ష్మికి ట్విట్టర్ ద్వారా ఫిర్యాదు చేశారు. దీంతో తక్షణమే అక్రమ నిర్మాణాలపై చర్యలు తీసుకోవాలని మేయర్ జీహెచ్ఎంసీ టౌన్ప్లానింగ్ అధికారులను ఆదేశించారు.
దీంతో జూబ్లీహిల్స్ పోలీసుల బందోబస్తు నడుమ సర్కిల్-18 టౌన్ప్లానింగ్ ఏసీపీ రాజ్కుమార్ నేతృత్వంలో అక్రమ నిర్మాణాలను నేలమట్టం చేశారు. ఈ సందర్భంగా నిర్మాణదారులు టౌన్ప్లానింగ్ సిబ్బందితో వాగ్వాదానికి దిగారు. పోలీసుల జోక్యంతో కూల్చివేతలను కొనసాగించారు.