కరోనా మహమ్మారిని ఎదుర్కొనే మహాయజ్ఞంలో ప్రాణాలను పణంగా పెట్టి పోరాడుతున్న వైద్యులు, ఫ్రంట్లైన్ వారియర్స్ త్యాగాలను కొనియాడుతూ ‘దారి లేదా’ పేరుతో ప్రత్యేక మ్యూజిక్ వీడియోను రూపొందించారు హీరో నాని. ఆయన సమర్పణలో తెరకెక్కిన ఈ మ్యూజిక్ వీడియోలో సత్యదేవ్, రూప కొడువయుర్ నటించారు. ఈ పాటకు కేకే సాహిత్యాన్ని అందించగా విజయ్ బుల్గానిన్ సంగీతాన్ని అందించారు. ‘కొవిడ్ నుంచి ప్రజలను కాపాడేందుకు ఫ్రంట్లైన్ వర్కర్స్ ఎన్నో త్యాగాలు చేశారు. కరోనా బాధితుల సంక్షేమమే బాధ్యతగా భావించి అంకితభావంతో పనిచేసిన వారందరికీ ఆ పాటను అంకితం ఇస్తున్నాం. ఈ నెల 18న ఈ గీతాన్ని విడుదలచేస్తాం’ అని నాని తెలిపారు.