శనివారం 05 డిసెంబర్ 2020
Hyderabad - Nov 01, 2020 , 06:49:45

జీహెచ్‌ఎంసీ ఓటర్ల తుది జాబితా షెడ్యూల్‌ విడుదల

జీహెచ్‌ఎంసీ ఓటర్ల తుది జాబితా షెడ్యూల్‌ విడుదల

హైదరాబాద్‌ : బల్దియా ఎన్నికల్లో ప్రధాన ఘట్టమైన వార్డుల వారీ ఓటర్ల జాబితా రూపకల్పనకు రాష్ట్ర ఎన్నికల కమిషన్‌ షెడ్యూల్‌ను విడుదల చేసింది. దీని ప్రకారం నవంబర్‌ 13న వార్డుల వారీ ఓటర్ల తుది జాబితాను ప్రకటించాలని నిర్ణయించారు. జనవరి 1, 2020 ఓటర్ల జాబితా ఆధారంగా 150 వార్డులకు సంబంధించి ఓటర్ల జాబితా రూపకల్పన బాధ్యతను డిప్యూటీ కమిషనర్లకు అప్పగించారు. బల్దియా ఎన్నికల నోటిఫికేషన్‌ విడుదలయ్యే నాటికి 18 సంవత్సరాలు నిండినవారికి కూడా జాబితాలో పేర్ల నమోదుకు అవకాశం కల్పిస్తారు. 2016 ఎన్నికల సందర్భంగా ఉన్న 150 వార్డులను యథావిథిగా కొనసాగించాలని, అలాగే కొత్త మున్సిపల్‌ చట్టం ప్రకారం ఎస్సీ, ఎస్టీ, బీసీ, మహిళా రిజర్వేషన్లను రెండు దఫాలు కొనసాగించాలని నిర్ణయించిన నేపథ్యంలో వార్డుల వారీ ఓటర్ల జాబితా రూపకల్పనకు షెడ్యూల్‌ను విడుదల చేసినట్లు ఎన్నికల కమిషన్‌ స్పష్టం చేసింది.

వార్డుల వారీ ఓటర్ల జాబితా షెడ్యూల్‌....

  • వార్డుల వారీ ఫొటోతో కూడిన ముసాయిదా ఓటర్ల జాబితా ప్రదర్శన- 07-11-2020
  • అభ్యంతరాల స్వీకరణ- 08-11-2020 నుంచి 11-11-2020
  • రాజకీయ పార్టీల ప్రతినిధులతో ఎన్నికల అథారిటీ/ బల్దియా కమిషనర్‌ సమావేశం- 09-11-2020
  • సర్కిల్‌ స్థాయిలో రాజకీయ పార్టీల ప్రతినిధులతో డిప్యూటీ కమిషనర్ల సమావేశం- 10-11-2020
  • అభ్యంతరాల పరిష్కారం- 12-11-2020
  • వార్డుల వారీగా ఫొటోతో కూడిన ఓటర్ల తుది జాబితా ప్రచురణ- 13-11-2020