గౌతమ్ గంభీర్ సారథిగా ఉన్నప్పుడు రెండుసార్లు ఐపీఎల్ టైటిల్ (2012, 2014) దక్కించుకొని అగ్రజట్టుగా పేరు తెచ్చుకున్న కోల్కతా.. అతడు వెళ్లిపోయాక మెరుపులు మెరిపించలేకపోయింది. రెండేండ్లుగా కనీసం ప్లే ఆఫ్స్కు కూడా చేరలేకపోయింది. దినేశ్ కార్తీక్, ఇయాన్ మోర్గాన్, ఆండ్రీ రసెల్, సునీల్ నరేన్ లాంటి విధ్వంసకర ఆటగాళ్లు ఉన్నా గతేడాది యూఏఈలో జరిగిన 13వ సీజన్లో స్థాయికి తగ్గట్టు సత్తాచాటలేకపోయింది. సీజన్ మధ్యలో కార్తీక్ నుంచి ప్రపంచకప్ గెలిచిన ఇంగ్లండ్ కెప్టెన్ మోర్గాన్కు కెప్టెన్సీ అప్పగించినా లాభం లేకపోయింది.
పాయింట్ల పట్టికలో ఐదో స్థానంతో పోరు ముగించింది. నిలకడలేమి ప్రధాన సమస్యగా ఉన్న ఆ జట్టు.. ఈ ఏడాది ఐపీఎల్ 14వ సీజన్లో దాన్ని అధిగమించాలని లక్ష్యంగా పెట్టుకుంది. ఈనెల 11న సన్రైజర్స్ హైదరాబాద్తో కోల్కతా తొలి మ్యాచ్ ఆడనుంది.
భారత ఆటగాళ్లు: దినేశ్ కార్తీక్, శుభ్మన్ గిల్, నితీశ్ రానా, రింకు సింగ్, కుల్దీప్ యాదవ్, శివమ్ మావి, కమలేశ్ నాగర్కోటి, సందీప్ వారియర్, ప్రసిద్ధ్ కృష్ణ, రాహుల్ త్రిపాఠి, వరుణ్ చక్రవర్తి, వైభవ్ అరోరా, హర్భజన్ సింగ్, కరుణ్ నాయర్, వెంకటేశ్ అయ్యర్, పవన్ నెగి, షెల్డన్ జాక్సన్
విదేశీ ఆటగాళ్లు: ఇయాన్ మోర్గాన్ (కెప్టెన్), టిమ్ స్టీఫెర్ట్, అండ్రీ రసెల్, సునీల్ నరేన్, లూకీ ఫెర్గూసన్, ప్యాట్ కమిన్స్, షకీబల్ హసన్, బెన్ కటింగ్
బలాలు
పరిమిత ఓవర్ల క్రికెట్లో విజయవంతమైన కెప్టెన్గా ఇంగ్లండ్కు ప్రపంచకప్ అందించిన ఇయాన్ మోర్గాన్ పూర్తిస్థాయి కెప్టెన్గా ఉండడం ఈసారి కోల్కతాకు సానుకూలాంశం. దూకుడైన ఆటతో సిక్సర్ల వర్షం కురిపించడంలోనూ అతడు దిట్ట. వేలంలో షకీబల్ హసన్, బెన్ కటింగ్, హర్భజన్ సింగ్ లాంటి కీలక ఆటగాళ్లను తీసుకోవడంతో కేకేఆర్ మరింత బలంగా మారింది. విజయ్ హజారే ట్రోఫీలో అద్భుతంగా రాణించిన యువ కెరటాలు ఆల్రౌండర్ వెంకటేశ్ అయ్యర్, హ్యాట్రిక్ బౌలర్ వైభవ్ అరోరా జట్టులోకి వచ్చారు. గత సీజన్లో విఫలమైనా ఏ దశలోనైనా మ్యాచ్ గతిని మార్చేయగల ఆండ్రీ రసెల్, సునీల్ నరేన్ లాంటి ఆటగాళ్లు ఉన్నారు. యంగ్ టాలెంటెండ్ శుభమన్ గిల్, మోర్గాన్, కార్తీక్ రెచ్చిపోతే జట్టుకు తిరుగుండదు. రూ.15 కోట్ల ఆటగాడు ప్యాట్ కమిన్స్, ఫెర్గూసన్తో పాటు ఇటీవల మెరిసిన ప్రసిద్ధ్ కృష్ణతో కేకేఆర్ పేస్ దళం పటిష్టంగా ఉంది.
బలహీనతలు
కోల్కతా స్పిన్ విభాగం ప్రస్తుతం బలహీనంగా ఉంది. కుల్దీప్ యాదవ్ గతసీజన్లో పూర్తిగా విఫలం కాగా.. బౌలింగ్ యాక్షన్ మార్చుకున్నాక నరేన్ అప్పటి మ్యాజిక్ను చూపలేకపోతున్నాడు. మిస్టరీ స్పిన్నర్ వరుణ్ చక్రవర్తి ఫిట్నెస్పై సందిగ్ధత కొనసాగుతూనే ఉంది. ఇక జట్టులోకి వచ్చిన సీనియర్ స్పిన్నర్ హర్భజన్ సింగ్ సుదీర్ఘ కాలంగా మ్యాచ్లు ఆడకపోవడంతో ఎలాంటి ప్రదర్శన చేస్తాడో తెలియని పరిస్థితి. మరోవైపు బ్యాటింగ్ ఆర్డర్ సైతం కోల్కతాకు పెద్ద తలనొప్పిగా ఉంది. అసలు ఓపెనర్లుగా ఎవరిని పంపాలో కూడా ఇంకా ఆ జట్టుకు స్పష్టత లేదు. గతేడాది మోర్గాన్ మరీ ఐదు, ఆరో స్థానంలో బ్యాటింగ్కు రావడం తీవ్ర ప్రభావం చూపింది.