సిటీబ్యూరో, సెప్టెంబర్ 16(నమస్తే తెలంగాణ) : మీ చిన్నారులు బయటికి వెళ్తే అనుక్షణం ఓ కన్నేసి ఉంచండి. ఏమరుపాటు పనికిరాదు.. అప్రమత్తంగా లేకపోతే.. పెను ప్రమాదం తప్పదు. అది ఇంటి పక్క నుంచే కావొచ్చు. ఇందుకు సైదాబాద్ చిన్నారి ఘటనే ఉదాహరణ. ఈ ఘటన సభ్యసమాజాన్ని కదలించివేసింది. తల్లిదండ్రులకు కంటిమీద కునుకు లేకుండా చేసింది. ఎవరిని నమ్మాలి? ఎవరిని నమ్మకూడదో తెలియని పరిస్థితి దాపురించింది. చిన్నారులను కామాంధుల కంట పడకుండా కాపాడుకోవాల్సిన స్థితి ఏర్పడింది. ఒక్కటే మార్గం.. తమ పిల్లలకు జాగ్రత్తలు నేర్పించడం ఎంతో అవసరం. వారికి గుడ్ టచ్, బ్యాడ్ టచ్లపై అవగాహన కల్పించాలి. ఎవరైనా అసభ్యకరంగా ప్రవర్తిస్తే.. బిగ్గరగా అరవాలని సూచించాలి. ముఖ్యంగా ఉద్యోగాలు చేసే వారు తమ పిల్లల పట్ల మరింత అలర్ట్గా ఉండాలని మానసిక నిపుణులు సూచిస్తున్నారు.
పిల్లలను ఒంటరిగా వదలడం ప్రమాదకరం. ఎంత దగ్గరివాైళ్లెనా సరే వారిని నమ్మకపోవడమే ఇప్పుడున్న పరిస్థితుల్లో మంచిది. ఏదైనా అత్యవసర పనిమీద బయటకు వెళ్లాలనుకునే పేరెంట్స్ తమ పిల్లలను వెంట తీసుకెళ్లాలి. ఎవరూ అపరిచితులు? ఎవరు దగ్గరివాళ్లు? అనే విషయాలపై చిన్నారులకు స్పష్టత ఇవ్వాలి. ఎవరైనా పిల్లల పట్ల అసభ్యంగా ప్రవర్తిస్తున్నారంటే.. వెంటనే అరవాలనే విషయాన్ని తల్లిదండ్రులు పిల్లలకు అవగాహన కల్పించాలి. ఇలాంటి ఘటనలు పునరావృతం కాకుండా సైకోమెట్రిక్ టెస్టులు చేయించాల్సిన అవసరం ఉంది. స్కూళ్లు, కాలేజీలు, ఇతర అన్నీ ఆర్గనైజేషన్లలో దీనిని చేపట్టాలి. తద్వారా ఎలాంటి మానసిక రుగ్మతలతో ఎవరెవరూ బాధపడుతున్నారో తెలుస్తుంది. వారిని సైకియాట్రిస్టు దగ్గరకు పంపిస్తారు. నేరాలు చేసి జైలుకు వెళ్లిన వారి ప్రవర్తన ఎలా ఉందో జైళ్ల శాఖ వారి ప్రొఫైల్ రెడీ చేయాలి. ఇలాంటి ఆటిట్యూడ్ ఉన్నవారు ఏ తరహా నేరాలకు పాల్పడుతున్నారో గుర్తించి మేల్కోవచ్చు. – డాక్టర్ సి.వీరేందర్, సైకాలజిస్టు
ఎదుటి వారు ఏ ఆలోచనలతో ఉంటున్నారో గుర్తించడం కష్టం. అలాంటప్పుడు పిల్లలను అంటిపెట్టుకుని ఉండాల్సిన బాధ్యత తల్లిదండ్రులదే. చుట్టుపక్కల వాళ్లు ఎలాంటి వాళ్లో ఓ అవగాహన ఉండాలి. వారి మానసిక పరిస్థితి ఆరా తీయాలి. పిల్లలను అన్ని విషయాల్లో గమనించాలి. వారి ప్రవర్తనపై దృష్టి పెట్టాలి. ఎవరైనా అవకాశం కోసం ఎదురు చూస్తుంటారనే విషయం గుర్తుంచుకోవాలి. ఉద్యోగులు తమ పిల్లలను ఇంట్లో వదిలి వెళ్లిపోతారు. అలాంటి వారు మరింతగా అప్రమత్తంగా ఉండాలి. పిల్లలు ఎవరిని కలుస్తున్నారు? ఎవరితో మాట్లాడుతున్నారు? తెలుసుకోవాలి. -మోత్కూరి రాంచందర్, కౌన్సెలింగ్ సైకాలజిస్టు
ఈ విషయాలపై అవగాహన పెంచుకోండి