శుక్రవారం 26 ఫిబ్రవరి 2021
Hyderabad - Jan 24, 2021 , 07:00:47

డ్రైవరన్నా.. సలాం!

డ్రైవరన్నా.. సలాం!

హైదరాబాద్‌, : మనల్ని సురక్షితంగా గమ్యస్థానాలకు చేరవేయడంలో డ్రైవర్లదే కీలకపాత్ర. రెప్పపాటుకాలం ఏమరుపాటుగా ఉన్నా ప్రమాదం తప్పదు. ఎంతో ఒత్తిడి ఎదుర్కొంటూ, నిత్యం ప్రమాదాలతో సహవాసం చేసే డ్రైవర్ల సేవలు ఎనలేనివి. భద్రతకు మారుపేరుగా ఆర్టీసీని నిలుపడంలో వీరిదే ప్రధాన పాత్ర. ఏటా జనవరి 24న రాష్ట్ర డ్రైవర్ల దినోత్సవం నిర్వహిస్తూ వారికి కృతజ్ఞతలు తెలియజేస్తున్నారు. నేడు డ్రైవర్ల దినోత్సవం సందర్భంగా కథనం..

ఏకాగ్రతతో ఉండాలి..

ఒకసారి డ్రైవింగ్‌ సీట్లో కూర్చున్న తర్వాత దృష్టంతా పనిమీదే ఉండాలి. ఎదుటివాళ్లు ఎలా వెళ్తున్నారనే అంశం కంటే మనం ఎంత అప్రమత్తంగా ఉన్నామన్నదే లక్ష్యం కావాలి. ఒక్క మాటలో చెబితే ఎదురుగా వచ్చేవాళ్లు గుడ్డివాళ్లు.. మన ముందు వెళుతున్నవాళ్లు చెవిటివాళ్లే అనుకోవాలి. అప్పుడు ఏ పరిస్థితి అయినా మనం ఎదుర్కొనేలా సిద్ధంగా ఉంటాం. నా ఇన్నేండ్ల సర్వీసులో నేను పాటిస్తున్నది అదే. - గాయం నరేందర్‌రెడ్డి, రెండుసార్లు ఉత్తమ డ్రైవర్‌, దిల్‌సుఖ్‌నగర్‌ డిపో

ఒత్తిడిని జయించి.. ఏకాగ్రతతో పనిచేసేలా..

ఆర్టీసీలో రాష్ట్రవ్యాప్తంగా అన్ని డిపోల్లో కలిసి 17,854 మంది డ్రైవర్లు పనిచేస్తున్నారు. డ్రైవర్లు పూర్తి ఏకాగ్రతతో విధులు నిర్వర్తించేలా ఆర్టీసీ అధికారులు అన్ని చర్యలు తీసుకుంటున్నారు. రోడ్డు ప్రమాదాలు చేయకుండా సురక్షితంగా ప్రయాణికులను గమ్యానికి చేర్చుతూ సేవలందిస్తున్న వారికి రాష్ట్రస్థాయి, జోనల్‌ స్థాయి, రీజినల్‌ స్థాయిల్లో ముగ్గురు ఉత్తమ డ్రైవర్లను ఎంపిక చేసి అవార్డులతో సత్కరిస్తున్నారు. అదే సమయంలో ఎవరైనా తరచూ ప్రమాదాలకు కారణమవుతుంటే.. వారి ఇబ్బందులు తెలుసుకోవడంతోపాటు అవసరం మేరకు మానసికంగా కౌన్సెలింగ్‌ ఇవ్వడం.. కుటుంబ సభ్యులతోనూ మాట్లాడి వివరాలు తెలుసుకునేలా అధికారులు చొరవ తీసుకుంటున్నారు. ఇలా ప్రతి చర్య ఉత్తమ ఫలితాలిస్తున్నదని ఆర్టీసీ ఈడీ (రెవెన్యూ) పురుషోత్తం తెలిపారు. బస్సుల కండీషన్‌ మాదిరిగానే డ్రైవర్‌ ఫిట్‌నెస్‌కు సంస్థ అత్యంత ప్రాధాన్యం ఇస్తున్నట్టు ఉద్యోగ సంఘం నాయకుడు థామస్‌రెడ్డి తెలిపారు.  

కుటుంబ సహకారంతోనే..

డ్యూటీ సమయం కంటే గంట ముందే డిపోకు చేరుకోవాలి. అప్పుడు ఒత్తిడి లేకుండా ప్రశాంతంగా బండి కండీషన్‌ చూసుకోవచ్చు. ఏ సమస్య ఉన్నా సరిచేసుకున్నాకే బయల్దేరొచ్చు. అట్లనే సరైన నిద్ర ఉండేలా చూసుకోవాలి. ముఖ్యంగా కుటుంబం నుంచి సహకారం ఎంతో ముఖ్యం. డ్రైవర్‌గా 31 ఏండ్లుగా ఏ ప్రమాదం జరుగకుండా డ్రైవింగ్‌ చేస్తున్నానంటే నా కుటుంబ సహకారమే కారణం. - ఎన్‌ రామాచారి, రెండుసార్లు ఉత్తమ డ్రైవర్‌, ఉప్పల్‌ డిపో

VIDEOS

logo