దోహా: 35వేల చదరపు మీటర్ల వైశాల్యం. రూఫ్టాప్ బార్లు, స్విమ్మింగ్ పూల్స్, మసాజ్ సెంటర్లు, హెలీప్యాడ్లు, బీచ్, క్లబ్బులు, గోల్ఫ్, మినీ థియేటర్లు, గేమ్ జోన్లు.. ఏంటి ఏదైనా సిటీ గురించి చెబుతున్నారా అంటారా?? అదేంలేదు. ఓ హోటల్ గురించే ఈ ఉపోద్ఘాతమంతా. సముద్రం మధ్యలో, కెరటాలపై తేలియాడేలా ఓ ఐదు నక్షత్రాల హోటల్ కతార్లో రూపుదిద్దుకుంటున్నది. ఈ హోటల్ నిర్మాణం గతేడాది మార్చిలో ఆరంభమైంది. సముద్రపు అలల మీద గుండ్రంగా తిరుగుతూ సొంతంగా విద్యుత్ను తయారు చేసుకోవడం ఈ హోటల్ ప్రత్యేకత. 2025 నాటికి అందుబాటులోకి రానున్న ఈ జలలోక స్వర్గాన్ని ‘హైరీ అతక్’ అనే ఓ టర్కీ కంపెనీ నిర్మిస్తున్నది. ప్రతి ఫ్లోర్లో పచ్చటి మొక్కలతో నిండిన ఈ హోటల్ వల్ల పర్యావరణానికి ఎలాంటి హాని జరుగబోదని ‘హైరీ అతక్’ ప్రతినిధులు తెలిపారు. హోటల్ నుంచి విడుదలయ్యే వ్యర్థాలను రీ-సైకిల్ చేసే వ్యవస్థను కూడా ఏర్పాటు చేస్తున్నట్టు వెల్లడించారు.