రూ.11,490 కోట్లతో వార్షిక రుణ ప్రణాళిక సిద్ధం
వ్యవసాయ అనుబంధ రంగానికి ప్రాధాన్యం
సగానికిపైగా రుణాలు కేటాయింపు
ఇతర రంగాలకూ వర్తింపు
లక్ష్యాల ఆధారంగా బ్యాంకు రుణాలు
ఆదిలాబాద్, మార్చి 12(నమస్తే తెలంగాణ ప్రతినిధి):ఉమ్మడి ఆదిలాబాద్ జిల్లాలో వచ్చే ఆర్థిక సంవత్సరానికి (2021-22) వార్షిక రుణ ప్రణాళికను నాబార్డు విడుదల చేసింది. రూ.11,490 కోట్లతో ప్రణాళికను సిద్ధం చేయగా, ఇందులో వ్యవసాయ అనుబంధ రంగాలకు ప్రాధాన్యమిచ్చారు. పంట రుణాలతో పాటు యంత్ర సాయం, సాగు సాయం, ఇతరత్రా పనులకు 50 శాతానికి పైగా రుణాలను కేటాయించనున్నారు. మిగతా రుణాలను ఇతర రంగాలకు అందించనున్నారు. ఈ మేరకు బ్యాంకులకు లక్ష్యాలను నిర్దేశించనుండగా,అందుకు అనుగుణంగా సంబంధిత అధికారులు రుణాలను మంజూరు చేయనున్నారు.
రైతులు, ప్రజలు తమ అవసరాల కోసం బ్యాంకుల నుంచి రుణాలు తీసుకుంటారు. వానకాలం, యాసంగిలో పంటల అవసరాలకు అనుగుణంగా రైతులు బ్యాంకులను ఆశ్రయిస్తారు. ఇంతే కాకుండా విద్య, చిన్న. మధ్య పరిశ్రమలు, ఇండ్ల నిర్మాణాలు, తదితర వాటికి బ్యాంకులు రుణాలు ఇస్తాయి. యేటా ఈ రుణపరిమితి, ఏఏ రంగాలకు ఎంత కేటాయించాలో నాబార్డు స్పష్టం చేస్తుంది. నాబార్డు సూచనల మేరకు లీడ్ బ్యాంకు అధికారులు జిల్లాల వారీగా వార్షిక రుణ ప్రణాళికను నిర్ణయిస్తారు. అనంతరం బ్యాంకులకు లక్ష్యాలను నిర్దేశిస్తారు. ఆయా జిల్లాలో పంటల సాగు విస్తీర్ణం, రైతుల సంఖ్య, బ్యాంకుల సంఖ్య ఇతర అంశాలను పరిగనలోనికి తీసుకొని పంట రుణాలను కేటాయిస్తారు. యేటా వివిధ రంగాలకు కేటాయింపులను పెంచుతారు. ఈ సారి వ్యవసాయంతో పాటు ఇతర రంగాలకు ఎక్కువగా రుణాలు ఇవ్వాలని ప్రణాళికలో పేర్కొన్నారు.
జిల్లాల వారీగా..
ఉమ్మడి ఆదిలాబాద్ జిల్లాలో రూ.11,490 కోట్లతో రుణ ప్రణాళికను తయారు చేశారు. ఆదిలాబాద్ జిల్లాలో రూ.3,246.79 కోట్లు, నిర్మల్ జిల్లాలో రూ. 3,086.20 కోట్లు, మంచిర్యాలలో రూ.3192.70 కోట్లు, కుమ్రంభీ ఆసిఫాబాద్ జిల్లాలో రూ. 1965.10 కోట్లుగా రుణ ప్రణాళికలో పొందుపర్చారు. రైతులు వివిధ పంటలు సాగుచేసేందుకు పంట రుణాలకు ఇస్తారు. వీటితో పాటు పండ్లతోటల సాగు, పాడి పరిశ్రమ, వ్యవసాయ పరికరాల కొనుగోలు, బోర్లు, మోటర్లకు రుణాలు మంజూరు చేస్తారు. వీటితో పాటు పంటలను నిల్వ చేసుకునేందుకు గోదాముల నిర్మాణం, ఎరువుల తయారీ వంటి వాటికి రుణాలు ఇస్తారు. విత్తనోత్పత్తి, ఆహార శుద్ధి పరిశ్రమలు, నూనె తయారీ పరిశ్రమలకు కూడా బ్యాంకులు చేయూతనందిస్తాయి. నిరుద్యోగులు, మహిళా సంఘాల సభ్యులు, ఇతరులు స్వయం ఉపాధి పొందడానికి, చిన్న, కుటీర పరిశ్రమలకు బ్యాంకులు యేటా రుణాలు మంజూరు చేస్తాయి.