శరీరంలోని విషపదార్థాలను తొలగించుకునేందుకు 5 చిట్కాలు

మన రోజువారీ అలవాట్లు మినల్ని ఆరోగ్యంగా, అనారోగ్యంగా ఉంచడం చేస్తాయి. ఎలాంటి జీవితాన్ని ఇష్టపడతారో నిర్ణయించుకోవడం పూర్తిగా మన చేతుల్లో ఉన్నది. వాస్తవానికి, ఉదయాన్నే లేవడం, వ్యాయామం చేయడం చాలా సవాలుగా ఉంటుంది. కానీ ఇవి ఆరోగ్యంగా ఉండటానికి చాలా ప్రాథమిక దశలు. అంతే కాదు, ఈ అలవాట్లు శరీరంలోని విషపదార్థాలను బయటకు పంపించేందుకు ఉపయోగపడతాయి. కొన్ని సులభమైన చిట్కాలను అనుసరించడం ద్వారా ప్రతి సీజన్‌లో ఆరోగ్యంగా, చురుకుగా ఉండొచ్చు. అవేంటంటే..

ఉదయాన్నే నిమ్మరసం

ఉదయం నిద్ర లేవగానే గోరువెచ్చని నిమ్మ రసాన్ని తేనెతో కలిపి తీసుకోవడం చాలా మంచిది. ఈ అలవాటుతో శరీరం బరువు తగ్గడంతోపాటు కడుపు బాగా క్లియర్ అవుతుంది. దీని తరువాత తినే ఆహారం నేరుగా ఆరోగ్యానికి మేలు చేస్తుంది.

అధిక ఫైబర్ అవసరం

శరీరాన్ని సహజంగా విషపదార్థాలు లేకుండా చేయడానికి ఫైబర్ అధికంగా ఉండే ఆహారాలను తీసుకోవడం అలవాటు చేసుకోవాలి. ఈ ఆహారాలను నిత్యం మన మెనూలో ఉంచుకునేట్లు ప్రణాళిక చేసుకోవాలి. ఇందుకోసం క్యారెట్లు, దోసకాయలు, దుంపలు, మొలకలు, పచ్చి ఆకుకూరలు తినాలి.

హైడ్రేటెడ్‌గా ఉండండి

రోజుకు కనీసం రెండు లీటర్ల నీరు త్రాగడం శ్రేయస్కరం. తద్వారా శరీరంలో ఉండే విషపదార్థాలన్నీ తేలికగా తొలగిపోతాయి. ఇదేకాకుండా, తాగునీరు కొవ్వును తగ్గించడంలో సహాయపడుతుంది. ఇతర రకాల పానీయాలను నీటితో భర్తీ చేయడం మానుకోవాలి. కూల్‌డ్రింక్స్‌, ఎనర్జీ డ్రింక్స్‌ తీసుకోవడం మంచిది కాదు.

దినచర్యలో భాగంగా వ్యాయామం

వ్యాయామం అంటే బరువు తగ్గడం ఒక్కటి మాత్రమే కాదు. ఇది చాలా కాలం పాటు ఆరోగ్యంగా, యవ్వనంగా ఉండటానికి సహాయపడుతుంది. హార్మోన్ వ్యాయామం నుంచి ఎండార్ఫిన్‌లను విడుదల చేస్తుంది. మానసిక స్థితిని కూడా సంతోషంగా ఉంచుతుంది. వ్యాయామానికి రోజుకు కనీసం అరగంట సమయం కేటాయించి తేడా చూడండి.

నిద్ర విషయంలో రాజీ వద్దు

తగినంత నిద్ర పోవడం శరీరాన్ని తాజాగా ఉంచుతుంది. మెదడు కూడా చురుకుగా ఉంటుంది. శరీరం నష్టాన్ని సరిచేయడానికి అలాగే విషాల తొలగింపునకు నిద్ర పనిచేస్తుంది. అందుకని నిద్ర విషయంలో ఏ విధంగానూ రాజీ పడొద్దు.

ఇకపోతే, శరీరంలోని విషపదార్థాలను బయటకు విసర్జించేందుకు మనం నిత్యం కొన్నిరకాల ఆహారాలను తీసుకోవడం అలవాటు చేసుకోవాలి. నిమ్మ, ఆరెంజ్‌ పండ్లు తీసుకోవడం చాలా మంచిది. ఇవి విటమిన్ సీ తో నిండివుంటాయి. శరీరాన్ని దెబ్బతీసే ఫ్రీ-రాడికల్స్‌తో పోరాడుతాయి. వీటిలోని ఆల్కలైన్ శరీరం యొక్క పీహెచ్‌ సమతుల్యతను పునరుద్ధరించడానికి సహాయపడతాయి. అలాగే రోగనిరోధక శక్తిని కూడా బలంగా చేస్తుంది.

గ్రీన్‌ టీ

గ్రీన్ టీతో పాటు మచ్చా టీ కూడా శరీరంలోని విషాలను బయటకు పంపడంలో ప్రోత్సహిస్తుంది. గ్రీన్ టీలో యాంటీఆక్సిడెంట్లు పుష్కలంగా ఉండి కాలేయం పనితీరును పెంచుతాయి. మచ్చా టీ క్యాన్సర్‌తో పోరాడటానికి సహాయపడుతుంది. గుండె జబ్బులు, టైప్ 2 డయాబెటిస్, బరువు తగ్గడానికి సహాయపడుతుంది.

క్యాబేజీ

క్యాబేజీలో రసాయన సల్ఫోరాఫేన్ ఉండి శరీరంలోని విషాలతో పోరాడటానికి సహాయపడుతుంది. అలాగే యాంటీఆక్సిడెంట్ గ్లూటాథియోన్ కాలేయ పనితీరును పెంచుతుంది. ప్రేగు పనితీరును ప్రోత్సహించడంతో పాటు జీర్ణక్రియకు సహాయపడే ప్రయోజనకరమైన బ్యాక్టీరియాను కలిగి ఉంటుంది.

ఆకుకూరలు

ఆకుకూరలు జీర్ణవ్యవస్థలో క్లోరోఫిల్ స్థాయిని పెంచడమే కాకుండా శరీరంలోని విషపదార్థాలు బయటకు పంపించేందుకు సహాయపడతాయి. వీటిని సలాడ్‌గా తినవచ్చు లేదా వాటి నుంచి సూప్ తయారు చేసుకోవచ్చు.

బీట్‌రూట్

బీట్‌రూట్‌ పెద్ద మొత్తంలో ఫైబర్ కలిగివుండి.. కాలేయంలోని యాంటీఆక్సిడెంట్ ఎంజైమ్‌ల ఉత్పత్తిని పెంచుతాయి. కాలేయం, పిత్తాశయంలోని అదనపు పిత్తాన్ని తొలగించడానికి సహాయపడతాయి. బీట్‌రూట్‌లో మెగ్నీషియం, ఐరన్, విటమిన్ సీ వంటి పోషకాలు విరివిగా లభిస్తాయి.