ఉపవాసం చేస్తున్నప్పుడు పాలు తాగొచ్చా..?

ఉపవాసం అనేది ఒకప్పటి ఆచారమే అయినా.. ఇప్పుడది ఫ్యాషన్ అయింది. డైటింగ్, హెల్త్ కాన్షియస్, ఫిట్ నెస్ ఇలా వేరు వేరు కారణాలు చెప్పుకుంటూ ప్రతిఒక్కరూ ఫాస్టింగ్ చేస్తున్నారు. ఎందుకంటే.. ఉపవాసం అనేది శరీరానికి తక్కువ కేలరీలను అందిస్తుంది. నిజానికి ఉపవాసంలో ఉన్నప్పుడు ఆహార ఎంపికలపై ఎలాంటి పరిమితి లేదు. కాబట్టి చాలా మంది కొన్ని పాలు, పళ్ల రసాలు లాంటివి తీసుకుంటుంటారు. కానీ ఫాస్టింగ్ చేస్తున్నప్పుడు మీరు తాగే డ్రింక్స్ లో కొన్ని మీ ఆరోగ్యాన్ని అతలాకుతలం చేస్తాయని మీకు తెలుసా. అవును మీరు విన్నది నిజమే.. ముఖ్యంగా ఉపవాసంలో ఉన్నప్పుడు పాలు తాగొచ్చా లేదా అనే విషయాన్ని మీరు తప్పక తెలుసుకోవాల్సిందే..

ఉపవాసం చేయడానికి ముఖ్యమైన కారణం బరువు తగ్గడం. అంటే శరీరానికి తక్కువ కేలరీలను అందించడం అన్నమాట. దీంతో పాటు జీర్ణక్రియపై కూడా కాస్త దృష్టి పెట్టడం. ఫాస్టింగ్ ఉన్నప్పుడు మీ శరీరం ఆకలి గురించి ఆలోచిస్తుంది, అలాగే జీర్ణక్రియలో కొన్ని మార్పులు జరుగుతాయి. ఈ సమయంలో శరీరం కెటోసిస్‌లోకి ప్రవేశిస్తుంది. ఇవి శరీరంలో కార్బోహైడ్రేట్లు అందుబాటులో లేనప్పుడు కొవ్వుశక్తి కోసం ఉపయోగపడుతుంది.

ఉపవాసం ఉన్నప్పుడు బాడీని హైడ్రేటెడ్‌గా ఉండటం చాలా ముఖ్యం. ఇందుకు మీరు కూరగాయలు, పండ్లు సరిపోవు కాబట్టి.. పానీయాలపై ఆధారపడాల్సిందే. అయితే.. పిండి పదార్థాలు లేదా చక్కెరతో కూడిన పానీయాలు మీ శరీరం ఇన్సులిన్ అనే హార్మోన్ను స్రవిస్తాయి. కాబట్టి వీటిని తాగడం వల్ల మీరు ఉపవాసం ఉన్న ఫలితం లేకుండా పోతుంది.

పాలు తాగొచ్చా..?

పాల విషయానికొస్తే.. ఉపవాసం ఉన్నప్పుడు వీటితో చాలా జాగ్రత్తగా ఉండాలి. ఎందుకంటే పాలు, పాల పదార్థాల్లో కేలరీలు, సహజ చెక్కర, పిండి పదార్థాలు ఉంటాయి. ఒక కప్పు పాలలో దాదాపు 12గ్రాముల పిండి పదార్థాలుంటాయి. ఇవి ఇన్సులిన్ విడుదలను ప్రేరేపిస్తాయి. కాబట్టి ఫాస్టింగ్ టైంలో పాలు, పాల పదార్థాలకు దూరంగా ఉంటేనే మంచిది. తప్పనప్పుడు.. పావు కప్పు పాలతో టీ లేదా కాఫీ తాగితే ఏం కాదు. ఇవి మీ ఆకలిని అరికడతాయి. అలా కాకుండా ఎక్కువ పాలు తాగడం వల్ల మీ శరీరానికి ఎక్కువ కేలరీలు అంది బరువు పెరిగే అవకాశం ఉంది.