తెలంగాణ సంస్కృతీ సంప్రదాయాలకు ప్రతీకైన బతుకమ్మ సంబురాలు ఉమ్మడి మెదక్ జిల్లావ్యాప్తంగా తొమ్మిది రోజుల పాటు అట్టహాసంగా కొనసాగాయి. ఆడబిడ్డలు తీరొక్క పువ్వులతో బతుకమ్మలను పేర్చగా.. ఊరూవాడ పూలవనాలుగా మారాయి. గురువారం సద్దుల బతుకమ్మ సంబురాలు అంబరాన్నంటాయి. రంగురంగుల పూలతో బతుకమ్మాలను పేర్చి, అందంగా తయారై.. కూడళ్లు, చెరువులు, ఆలయాల వద్ద మహిళలు ఆడిపాడి సందడి చేశారు. అనంతరం నైవేద్యాలు సమర్పించి, వాయినాలు ఇచ్చిపుచ్చుకొని బతుకమ్మలను చెరువులు, కొలనుల్లో నిమజ్జనం చేశారు. ఈ ఉత్సవాలతో ఊరూవాడ సందడిగా మారింది. ఆడబిడ్డలతో ఇండ్లన్నీ కళకళలాడాయి.