సాగు ప్రణాళిక రెడీ

Wed,May 22, 2019 02:14 AM

-జిల్లాలో వానకాలం పంటల సాగు ఖరారు
-సిద్ధం చేసిన వ్యవసాయ శాఖ అధికారులు
-1,15,138 లక్షల హెక్టార్లలో సాగు లక్ష్యం
-16,987 క్వింటాళ్ల విత్తనాలు, 4,51,200 పత్తి విత్తన ప్యాకెట్లు అవసరం
-జిల్లాకు 51,274 మెట్రిక్ టన్నుల ఎరువుల కోసం నివేదిక
-1,34,580 మందికి రైతుబంధు

జనగామ, నమస్తే తెలంగాణ, మే 21: జిల్లాలో వానకాలం సాగు ప్రణాళిక ఖరారైంది. విత్తనాలు, ఎరువులు, పురుగు మందులకు సంబంధించిన అంచనాలతో వ్యవసాయ శాఖ అధికారులు ప్రభుత్వానికి నివేదిక అందజేశారు. జూన్ మొదటి వారంలో రుతుపవనాలు వచ్చే అవకాశం ఉందనే వాతావరణ శాఖ అంచనాలతో రైతులు సాగుకు సన్నద్ధమవుతున్నారు. ఈసారి జిల్లాలో 1,15,138 లక్షల హెక్టార్లలో పంటలు సాగయ్యే అవకాశం ఉందని అధికారులు అంచనా వేశారు. ఇప్పటికే 50 శాతం విత్తనాలు, 60 శాతం ఎరువులు అందుబాటులో ఉన్నట్లు అధికారులు చెబుతున్నారు. దుక్కిదున్ని సిద్ధం చేసుకున్న రైతులు తొలకరి పలకరించగానే విత్తనాలు నాటేందుకు సన్నద్ధమవుతున్నారు.

అందుబాటులో సబ్సిడీ విత్తనాలు
ఈ వానకాలం సాగు యాక్షన్ ప్లాన్‌కు అనుగుణంగా సబ్సిడీ విత్తనాలు, ఎరువులను రైతులకు అందుబాటులో ఉండేలా ఏర్పాట్లు చేస్తున్నారు. ఈనెలాఖరు నుంచే వ్యవసాయ పనులు ఆరంభించేందుకు రైతులు ఏర్పాట్లు చేసుకుంటున్నారు. భూసారాన్ని పెంచుకునేందుకు రైతులు ఇప్పటికే ఒండ్రు మట్టి, పశువుల పేడను పంట చేలల్లోకి తరలించుకున్నారు. ఈ నెల 25న రోహిణి కార్తె ఆరంభం అవుతుండగా, మృగశిర ప్రవేశించిన తర్వాత వర్షాలు పడగానే విత్తనాలు వేసుకునేందుకు వీలుగా విత్తన ప్యాకెట్లు, ఎరువులను కొనుగోలు చేసి నిల్వ చేసుకునేందుకు సిద్ధపడుతున్నారు. వేసవిలో ఒక సాలు దున్నకాలు పూర్తి చేసి చేలల్లో చెత్త ఏరి, కాల్చడం వంటి పనుల్లో నిమగ్నమైన రైతులు.. తొలకరి వర్షపు జల్లులతో తుది విడత దుక్కులు దున్ని భూమిని చదును చేయడం.. సేంద్రియ ఎరువులు చల్లి భూమిని ఇరువాలు సాలు దున్ని విత్తనాలు వేసేందుకు సిద్ధమవుతున్నారు.

68 క్లస్టర్లుగా యాక్షన్‌ప్లాన్
జిల్లాలోని 12 మండలాల పరిధిలో 68 క్లస్టర్లుగా వ్యవసాయ శాఖ అధికారులు యాక్షన్‌ప్లాన్ సిద్ధం చేశారు. జిల్లాలో మొత్తం 1,15,138 లక్షల హెక్టార్లలో అధిక భాగం పత్తి 74,707 వేల హెక్టార్లలో సాగవుతుందని అంచనా వేస్తున్న వ్యవసాయ శాఖ.. అందుకు అనుగుణంగా 4,51,200 ప్యాకెట్ల పత్తి విత్తనాలు సిద్ధం చేస్తోంది. వరి 24,735 హెక్టార్లు, మొక్కజొన్న 9,010 హెక్టార్లు, కందులు 4,949 హెక్టార్లు, మిర్చి 518 హెక్టార్లు, పెసర పంట 825 హెక్టార్లు, వేరుశనగ పంట 213 హెక్టార్లతోపాటు ఇతర చిరుధాన్యాల పంటలు సాగవుతాయని చెబుతున్నారు. వరిసాగు విస్తీర్ణానికి అనుగుణంగా 15,056 వేల హెక్టార్ల విత్తనాలు సిద్ధం చేస్తున్నారు.

పంటలకు సరిపడా ఎరువులు..
జిల్లాలో ప్రధాన వాణిజ్య పంటగా పత్తిసాగు చేస్తుండగా, తర్వాత వరి, మొక్కజొన్న సాగుకు రైతులు మొగ్గుచూపుతున్నారు. వానకాలం సీజన్‌లో జిల్లా రైతాంగానికి అన్ని పంటలకు కలిపి మొత్తం 51,274 మెట్రిక్ టన్నుల ఎరువులు అవసరమవుతాయని అధికారులు అంచనా వేశారు. ఇందులో యూరియా 16,114 మెట్రిక్ టన్నులు, డీఏపీ 8,722 మెట్రిక్ టన్నులు, కాంప్లెక్స్ ఎరువులు 16,400 మెట్రిక్ టన్నులు, ఎంవోపీ 10,040 మెట్రిక్ టన్నుల ఎరువులు వినియోగమవుతాయని అధికారులు చెబుతున్నారు.

జూన్ మొదటి వారంలో రైతుబంధు
వానకాలం సాగు పెట్టుబడిని రైతుల బ్యాంకు ఖాతాల్లోకి జూన్ మొదటి వారంలో జమ కానుండగా.. జిల్లాలోని 12 మండలాల పరిధిలో 1,34,580 మందికి ఈ పథకం ద్వారా ప్రయోజనం చేకూరనుంది. గత ఏడాది వానకాలంలో చెక్కులు, యాసంగి సాగుకు నేరుగా రైతు ఖాతాలకు ఎకరానికి రూ. 4 వేల చొప్పున పంట సాయం అందింది. మొన్నటి అసెంబ్లీ ఎన్నికల ముందు ఇచ్చిన హామీ మేరకు రెండు పంటలకు కలిపి ఏడాదికి ఎకరానికి రూ. 10 వేల చొప్పున పంట సాయం పెంచింది. దీంతో జూన్ మొదటి వారంలో ఎకరానికి రూ. 5 వేల చొప్పున రైతుబంధు సాయం అందబోతున్నది. వాస్తవానికి రైతుబంధు సాయం ఇప్పటికే అందాల్సి ఉండగా, వరుస ఎన్నికల కోడ్ నేపథ్యంలో జమ చేసే ప్రక్రియ ఆలస్యమైంది. గత ఏడాది జిల్లాలోని 13 మండలాల్లో 193 రెవెన్యూ గ్రామాల పరిధిలో 1,46,713 మంది రైతులకు చెందిన 1,28,994 పట్టాదారు పాస్‌పుస్తకాలపై రూ. 160.28 కోట్ల రైతుబంధు సాయం అందింది.

సాగులో ఏఈవోల సాయం..
జిల్లా ఆవిర్భావం తర్వాత జిల్లాకు కొత్తగా 39 మంది ఏఈవోలు నియామకమయ్యారు. వీరు సాగులో రైతులకు సాయం అందించే పనిలో నిమగ్నమయ్యారు. వానకాలం సీజన్‌లో రైతులు ఏరకం పంటలు, ఎంత విస్తీర్ణంలో సాగు చేయాలి, ఎలాంటి విత్తనాలు నాటాలి, ఎరువులు, పురుగు మందులు వాడాల్సిన మోతాదు ఎంత? దుక్కులు ఎలా సిద్ధం చేసుకోవాలి? ఎన్ని వానలు కురిసిన తర్వాత విత్తనాలు నాటాలి? వంటి మెళకువలపై ఏఈవోలు గ్రామాల్లో విస్తృత ప్రచారం చేస్తున్నారు. రైతులకు అవసరమైన సలహాలు, సూచనలు చేస్తుండడంతో గతంలో కంటే ఈసారి సాగు విస్తీర్ణం పెరుగుతుందని అధికారులు అంచనా వేస్తున్నారు. గతంలో వ్యవసాయ శాఖ అధికారుల సంఖ్య తక్కువగా ఉండి ఒక్కొక్కరు రెండుమూడు మండలాలకు ఇన్‌చార్జీలుగా వ్యవహరించడంతో క్షేత్రస్థాయిలో రైతులకు సరైన సలహాలు, సూచనలు అందలేదు. దీంతో రైతులు ఇష్టానుసారంగా పంటలు సాగు చేసి విచ్చలవిడిగా ఎరువులు, పురుగుల మందులు వాడి నష్టపోయారు. పంట రకాలు, విత్తనాలపై అవగాహన లేక బోగస్ కంపెనీల ప్రచారంతో కొందరు రైతులు నకిలీ విత్తనాలతో నష్టపోయిన ఘటనలు ఉన్నాయి. కొత్త జిల్లాల ఏర్పాటుతో వ్యవసాయ శాఖలో వినూత్న మార్పులు చోటుచేసుకున్న ఫలితంగా జిల్లా, డివిజన్ స్థాయి అధికారుల పర్యవేక్షణ, క్షేత్రస్థాయి పర్యటనలు, సమావేశాలతో వ్యవసాయంలో అధికారుల పాత్ర పెరిగింది. రైతులు ఎలాంటి పంటలు సాగు చేస్తే దిగుబడి వస్తుందనే అంశంలో వేసవిలోనే మట్టి నమూనాలను సేకరించి భూసార వివరాలను కంప్యూటరీకరణ చేయడం వంటి పరిణామాలు మేలు చేయనున్నాయి. నీటి లభ్యత ఉన్న ప్రాంతాలు, భూములు, బోర్లు, బావుల కింద సాగయ్యే పంటలపై సమగ్ర సర్వే నిర్వహించారు.

62
Tags

More News

VIRAL NEWS

LATEST NEWS

Cinema News

Health Articles