సుల్తాన్బజార్ : ప్రతి వాహనదారుడు ట్రాఫిక్ నిబంధనలను తప్పకుండా పాటించాలని సినీనటి అంజలి పేర్కొన్నారు. ఈ మేరకు హైదరాబాద్ సిటీ పోలీసులు, సిటీ సెక్యూరిటీ కౌన్సిల్ సంయుక్తాధ్వర్యంలో ట్రాఫిక్ నిబంధనలపై అవగాహనలో భాగంగా రూపొందించిన మూడు షార్ట్ ఫిలిం సీడీలను సినీనటి అంజలి, నగర పోలీస్ కమిషనర్ అంజనీ కుమార్, ట్రాఫిక్ సీపీ అనిల్ కుమార్ ఆవిష్కరించారు. అనంతరం ఆమె మాట్లాడుతూ.. ప్రతి వాహనదారుడు నిబంధనలపై అవగాహన కలిగి ఉండాలన్నారు. ఈ షార్ట్ఫిలింల వలన ప్రజలలో ట్రాఫిక్ నిబంధనలపై అవగాహన పెరుగుతుందన్నారు.
నగర పోలీస్ కమిషనర్ అంజనీ కుమార్ మాట్లాడుతూ.. నగరంలో ట్రాఫిక్ పోలీసుల కృషితో రోడ్డు ప్రమాదాలు తగ్గుతున్నాయన్నారు. ట్రాఫిక్ నిబంధనలపై ప్రజలలో అవగాహన కల్పించేందుకు సిటీ పోలీసుల ఆధ్వర్యంలో అనేక కార్యక్రమాలను చేపడుతున్నామన్నారు. ట్రాఫిక్ సీపీ అనిల్ కుమార్ మాట్లాడుతూ.. హైదరాబాద్ సిటీలో హెల్మెట్ లేకుండా ప్రయాణం, సిగ్నల్ జంప్, ట్రిపుల్ రైడింగ్, రాంగ్ రూట్లో డ్రైవింగ్ చేస్తే జరిగే ప్రమాదాలపై ఈ షార్ట్ ఫిలింలను రూపొందించామని తెలిపారు. పోలీస్ అధికారులు తరుణ్ జోషి, డీఎస్ చౌహాన్, పలువురు అధికారులు పాల్గొన్నారు.