కొత్త బైక్‌పై జాలీ రైడ్‌కు వెళ్లి కాలువలో పడి యువకుడి మృతి

నల్లగొండ : జిల్లాలోని మిర్యాలగూడ మండలం రాయినిపాలెం గ్రామంలో విషాద సంఘటన చోటుచేసుకుంది. మోటారు సైకిల్‌పై వెళ్తున్న యువకుడు అదుపుతప్పి ఎన్‌ఎస్‌పీ కాలువలో పడటంతో మృతిచెందాడు. ఆదివారం చోటుచేసుకున్న ఘటన వివరాలిలా ఉన్నాయి. యర్ర రాకేశ్‌(22) అనే యువకుడు మిర్యాలగూడ ప్రైవేటు కాలేజీలో డిగ్రీ చదువుతున్నాడు. కొవిడ్‌ నేపథ్యంలో కాలేజీలు బంద్‌ కావడంతో స్థానికంగా ఓ బట్టల దుకాణంలో పనిచేస్తున్నాడు. అతని స్నేహితుల్లో ఒకరు కొత్త పల్సర్‌ బైక్‌ కొనడంతో రైడ్‌కి వెళ్లాడు.

అధికవేగం కారణంగా అదుపుతప్పడంతో రాయినిపాలెం వద్ద కాలువలో పడ్డాడు. ఈత తెలిసినప్పటికీ బైక్‌ మీద పడటంతో తనకు తానుగా రక్షించుకోలేక మునిగి చనిపోయాడు. సమాచారం అందుకున్న మిర్యాలగూడ పోలీసులు సంఘటనా స్థలానికి చేరుకున్నారు. యువకుడి ఆచూకీ కోసం గాలింపు చర్యలు చేపట్టారు. మృతదేహాన్ని కనుగొన్న పోలీసులు కాలువ నుంచి బయటకు తీసి పోస్టుమార్టం నిమిత్తం మిర్యాలగూడ ఏరియా ఆస్పత్రికి తరలించారు.