పవన్ కళ్యాణ్ హీరోగా నటిస్తున్న వకీల్ సాబ్ సినిమాపై అంచనాలు రోజురోజుకీ పెరిగిపోతున్నాయి. ఈ దూకుడు చూస్తుంటే అమ్మో అనిపిస్తుంది. సాధారణంగానే పవన్ సినిమాలు అంటే భారీ అంచనాలుంటాయి. అందులోనూ మూడు సంవత్సరాల తర్వాత పవర్ స్టార్ నుంచి వస్తున్న సినిమా కావడంతో కళ్లు కాయలు కాచేలా చూస్తున్నారు పవన్ ఫ్యాన్స్. వీళ్లు సినిమా కోసం ఎంతగా వేచి చూస్తున్నారు అనేది ట్రైలర్కు వచ్చిన స్పందన చూస్తుంటేనే అర్థమైపోతుంది. ఇప్పుడు విడుదలకు సిద్ధమవుతున్న తీరు.. ప్రీ రిలీజ్ బిజినెస్ ఇవన్నీ చూసిన తర్వాత నిర్మాతలకు, బయ్యార్లకు తెలియని భయం మొదలైంది. పైకి లేదని చెప్పినా కూడా లోపల మాత్రం ఇంత భారీ అంచనాలు చూసి.. ఏదైనా తేడా కొడితే ఎలా అనే కంగారు వాళ్లలో కనిపిస్తుంది. ఎందుకంటే వకీల్ సాబ్ సినిమాకు జరిగిన బిజినెస్ అలా ఉంది మరి.
పాజిటివ్ టాక్ వస్తే వకీల్ సాబ్ దూకుడు అడ్డుకోవడం ఎవరి తరం కాదు. ఏదేమైనప్పటికీ మొదటి వారంలోనే భారీగా కలెక్షన్లు రాబట్టాలని నిర్మాతలు ప్లాన్ చేస్తున్నారు. అందుకోసం సినిమాను రికార్డు స్థాయిలో విడుదల చేసేందుకు సిద్ధమవుతున్నారు. ఏప్రిల్ 9న తెలుగు రాష్ట్రాల్లో ఏ థియేటర్లో చూసినా కూడా పవన్ బొమ్మే కనిపించేలా విడుదల ప్లాన్ చేస్తున్నారు నిర్మాతలు. దాదాపు 95 శాతం థియేటర్స్లో వకీల్ సాబ్ మాత్రమే కనిపించబోతున్నాడు. ఓవర్సీస్లోనూ రప్ఫాడిస్తున్నాడు వకీల్ సాబ్.
ప్యాండమిక్ తర్వాత ఇంత భారీగా విడుదల కాబోతున్న ఇండియన్ సినిమా ఇదే. కరోనా తర్వాత ఓవర్సీస్లో మన సినిమాలు పెద్దగా ఆడటం లేదు. ఇలాంటి సమయంలో వచ్చిన జాతి రత్నాలు సినిమా తొలిసారి 1 మిలియన్ మార్క్ అందుకుని నమ్మకం పెంచేసింది. ఇప్పుడు పవన్ కళ్యాణ్ వకీల్ సాబ్ సినిమాతో తెలుగు సినిమాకు ఓవర్సీస్లో మునపటి కళను తీసుకురావాలని చూస్తున్నారు. అందుకే ఓవర్సీస్లోనే 700 స్క్రీన్లలో వకీల్ సాబ్ సినిమాను విడుదల చేయబోతున్నట్లు నిర్మాత బోనీ కపూర్ ప్రకటించాడు.
ఇది విన్న తర్వాత కొందరికి షాకింగ్ అనిపించొచ్చు కానీ కచ్చితంగా పవన్ రేంజ్కు ఇది సరిపోయే స్క్రీన్స్ అంటున్నారు అభిమానులు. ఒకవేళ టాక్ బాగా వచ్చిందంటే ప్రీమియర్స్ రూపంలోనే మిలియన్ రావడం ఖాయం. అదే వాళ్ల టార్గెట్ కూడా. ఏదేమైనా కూడా ఏప్రిల్ 9న దాదాపు 2500 థియేటర్స్లో వకీల్ సాబ్ విడుదలకు సిద్ధమవుతుంది.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి