బంజారాహిల్స్ : సినిమాల ప్రభావంతో ఓ బాలుడు ఎనిమిదేళ్ల బాలికను ముద్దుపెట్టుకోవడంతో పాటు అసభ్యంగా ప్రవర్తించాడు. ఇటీవల తాను చూసిన కొన్ని సినిమాల్లో చూసిన సన్నివేశాలను చూసి బాలికను ముద్దుపెట్టుకోవడంతో కేసు నమోదయింది. జూబ్లీహిల్స్ పీఎస్ పరిధిలో చోటు చేసుకున్న సంఘటన వివరాలు ఇలా ఉన్నాయి. జూబ్లీహిల్స్ రోడ్ నెం 10లో నివాసం ఉంటున్న బాలిక(8) ఒక ప్రైవేటు పాఠశాలలో మూడో తరగతి చదువుతోంది.
పక్కింటి వాచ్మెన్ కొడుకు(14) మంగళవారం సాయంత్రం అపార్ట్మెంట్వద్దకు వచ్చి అక్కడ ఆడుకుంటున్న బాలికను 6వ ఫ్లోర్లో ఎవరో పిలుస్తున్నారంటూ లిఫ్ట్లో తీసుకువెళ్లాడు. లిఫ్ట్లో వెళ్తున్న సమయంలో బాలికపట్ల అసభ్యకరంగా ప్రవర్తించాడు. దీంతో కిందకు వచ్చిన తర్వాత తల్లికి చెప్పింది. ఈ మేరకు బాలిక తల్లి జూబ్లీహిల్స్ పోలీసులకు ఫిర్యాదు చేయగా బాలుడిపై 354తో పాటు పోక్సొ చట్టం కింద కేసు నమోదు చేసి దర్యాప్తు చేపట్టారు.
కేసు విచారణలో భాగంగా బాలుడిని పీఎస్కు పిలిపించి విచారించగా తాను ఇటీవల అర్జున్రెడ్డి, డియర్ కామ్రెడ్ సినిమాలు టీవీలో చూసానని, వాటిలో హీరోయిన్ను ముద్దు పెట్టుకునే సీన్లు తనకు నచ్చాయని, తాను కూడా అలా చేయాలనే ఉద్దేశ్యంతో అలా చేశానంటూ చెప్పడంతో పోలీసులు షాక్కు గురయ్యారు. బాలుడిని జువైనల్ హోమ్కు తరలించారు.