వికారాబాద్, జూన్ 22, (నమస్తే తెలంగాణ) : ప్రతి ఇంట్లో ఆడపిల్ల పుట్టాలని.. ఆ ఇంటికి ఆడపిల్ల ఉంటే మహాలక్ష్మిగా పిలుచుకుంటారు. గ్రామీణ జిల్లా అయిన వికారాబాద్ ఆడపిల్లలతో లక్ష్మీ కళ కాంతులీనుతున్నది. కేంద్ర జనగణన విభాగం తాజాగా విడుదల చేసిన 2019 జనన మరణ లెక్కల ప్రకారం వీరి నిష్పత్తి గత మూడేండ్లలో పెరిగింది. జిల్లాలో ఎక్కువగా ఆడపిల్లలు పుడుతున్నారు. బాలురకన్నా బాలికలు ఎక్కువగా ఉన్నారు. జిల్లాలో బాలురు 9274 కాగా.. బాలికలు 9519 మంది ఉన్నట్లు జనగణన శాఖ తాజా గణంకాలు చెబుతున్నాయి. బాలురకన్నా బాలికలు ఎక్కువగా ఉండి ఆడపిల్లల లింగనిష్పత్తిలో జిల్లా ఆదర్శంగా నిలుస్తున్నది. జిల్లాలో బాలుర కంటే 245 మంది బాలికలే అధికంగా ఉన్నారు. 2019లో వికారాబాద్ జిల్లాలో బాలురు 9274, బాలికలు 9519 జననాలు నమోదయ్యాయి.
రాష్ట్రంలో జిల్లా టాప్ పోజిషన్
వికారాబాద్ జిల్లాలో ఆడపిల్లల సంఖ్య బాగుంది. రాష్ట్రంలో బాలికల నిష్పత్తిలో జిల్లా టాప్ పొజిషన్లో ఉంది. 2011 జనాభా లెక్కల తీరుతో పోలిస్తే 0-6 సంవత్సరాల చిన్నారుల్లో ఊహకందని విధంగా బాలుర నిష్పత్తి తగ్గుతున్నది. ఏయేటికాయేడు ఆడపిల్లల జననాలు పెరుగుతున్నాయి.
చైతన్యం దిశగా దృష్టి
జిల్లాలో బాలికల పట్ల వివక్ష తగ్గినా.. బాలుర విషయంలో ముందుకు వెళ్లాల్సిన అవసరం ఉంది. ప్రధానంగా స్త్రీ, శిశు సంక్షేమ శాఖ బాధ్యత మరింతగా పనిచేయాల్సి ఉంది. ‘బేటీ బచావో..బేటీ పడావో..’ లాంటి మంచి కార్యక్రమాలను పక్కాగా అమలు చేస్తే సత్ఫలితాలుంటాయి. ఇక శిశు మరణాలు తగ్గించే దిశగా వైద్య ఆరోగ్య శాఖ, ఐసీడీఎస్ విభాగాలు మరింత సమర్థవంతంగా పనిచేయాల్సిన అవసరం ఉంది. ఈ దిశగా అసలైన వికాసం వెల్లివిరిస్తే ఆడపిల్లలతోపాటుగా అమ్మకు తగిన ఆదరణ లభిస్తుంది.
జిల్లాలోని 19 మండలాల్లో 1,97,727 ఇండ్లలో 9,41,383 మంది ఉన్నారు. ఇందులో 4,70,686 మంది పురుషులు, 4,70,697 మంది మహిళలు ఉన్నారు. కాగా ఇక్కడ కూడా పురుషుల కంటే 11 మంది మహిళలు అధికంగా ఉన్నారు. 2011 జనాభా లెక్కల ప్రకారం 1,16,891 మంది మొత్తం 0-6 వయస్సు వాళ్లు ఉన్నారు. ఇందులో బాలురు 60,109, బాలికలు 56,782 మంది ఉన్నట్లు గణాంకాలు వెల్లడిస్తున్నాయి.