న్యూఢిల్లీ: వృద్ధురాలి హ్యాండ్బ్యాగ్ను ఒక దొంగ లాక్కున్నాడు. దానిని గట్టిగా పట్టుకోవడంతో ఆమె కింద పడిపోయింది. అయినా ఆ వ్యక్తి వదిలిపెట్టలేదు. హ్యాండ్బ్యాగ్తోసహా ఆ వృద్ధురాలిని రోడ్డుపై కొంతదూరం లాక్కెళ్లాడు. గాయపడిన ఆమె చివరకు హ్యాండ్బ్యాగ్ను వదిలేయడంతో దానిని తీసుకుని పారిపోయాడు. దేశ రాజధాని ఢిల్లీలోని సీఆర్ పార్క్ ప్రాంతంలోని వృద్ధురాలి ఇంటి ముందు ఈ నెల 3న ఈ ఘటన జరిగింది. ఇదంతా అక్కడున్న సీసీటీవీలో రికార్డైంది. పోలీసులు కేసు నమోదు చేసి దర్యాప్తు చేస్తున్నారు. సీసీటీవీ ఫుటేజ్ ఆధారంగా నిందితుడ్ని గుర్తించేందుకు ప్రయత్నిస్తున్నారు. కాగా, వృద్ధులు రాత్రి వేళ ఒంటరిగా బయటకు వెళ్లవద్దని పోలీసులు సూచించారు.