నిర్భయ ఘటనను తలపించేలా సామూహిక లైంగిక దాడి

రాంచీ: ఢిల్లీ నిర్భయ ఘటనను తలపించేలా ఓ మహిళపై సామూహిక లైంగిక దాడి జరిగింది. జార్ఖండ్‌ రాష్ట్రం చత్రాలోని హంటర్‌గంజ్ ప్రాంతంలో ఈ దారుణం వెలుగుచూసింది. గురువారం రాత్రి బహిర్భూమి కోసం ఇంటి నుంచి బయటకు వచ్చిన 50 ఏండ్ల వితంతు మహిళను ముగ్గురు వ్యక్తులు కిడ్నాప్‌ చేశారు. మారుమూల ప్రాంతానికి తీసుకెళ్లి సామూహిక అత్యాచారానికి పాల్పడ్డారు. ఆమె ప్రైవేట్‌ బాగాల్లోకి గ్లాసు చొప్పించి దారుణంగా హింసించారు. ఈ విషయాన్ని బయటకు చెబితే చంపేస్తామని బెదిరించి వెళ్లిపోయారు. 

కాగా ఆ మహిళ కోసం వెతికిన బంధువులు రక్తం మడుగులో ఉన్న ఆమెను గుర్తించి స్థానిక ప్రభుత్వ ఆసుపత్రికి తరలించారు. అనంతరం మెరుగైన వైద్యం కోసం బీహార్‌‌ రాష్ట్రం గయాలోని అనుగ్రా నారాయణ మగధ్ మెడికల్ కాలేజీ ఆసుపత్రికి తరలించి చికిత్స అందిస్తున్నారు. బాధితురాలి ఆరోగ్య పరిస్థితి విషమంగా ఉన్నదని, ఆమె ప్రాణాలతో పోరాడుతున్నదని వైద్యులు తెలిపారు. కాగా పోలీసులు ఇద్దరు వ్యక్తులను అరెస్ట్‌ చేశారు. పరారిలో ఉన్న మరో వ్యక్తి కోసం గాలిస్తున్నారు. కేసు విచారణ త్వరగా జరిగి నిందితులకు కఠిన శిక్షలు పడేలా చర్యలు చేపడతామని ఎస్పీ రిషబ్‌ ఝా తెలిపారు. 

లోక‌ల్ టు గ్లోబ‌ల్‌.. వార్త ఏదైనా.. అన్నీ ఒకే యాప్‌లో. న‌మ‌స్తే తెలం­గాణ ఆండ్రా­యిడ్ యాప్ డౌన్‌­లోడ్ చేసు­కోండి