17వ రోజు క్రాక్ సంచలనం..రిపబ్లిక్ డే స్పెషల్..!

రవితేజ హీరోగా నటించిన క్రాక్ సినిమా సంక్రాంతికి విడుదలై సంచలన విజయం సాధించింది. ఇప్పటికే దాదాపు 35 కోట్ల షేర్ వసూలు చేసింది ఈ సినిమా. ఇన్ని సంవత్సరాల రవితేజ కెరీర్లో బిగ్గెస్ట్ బ్లాక్ బస్టర్ కోవిడ్ సమయంలో రావడం నిజంగానే ఆశ్చర్యంగా ఉంది అభిమానులకు. ఇప్పటి వరకు మాస్ రాజా కెరీర్ లో 30 కోట్లు దాటిన సినిమా ఒక్కటి కూడా లేదు. ఇప్పుడు ఆ లోటు క్రాక్ సినిమా పూర్తి చేసింది. విడుదలైన 16 రోజుల తర్వాత కూడా ఇప్పటికీ మంచి వసూళ్లు సాధిస్తుంది క్రాక్. ముఖ్యంగా జనవరి 26 రవితేజ పుట్టినరోజు..పైగా పబ్లిక్ హాలిడే కూడా కావడంతో ఈ సినిమాకు అదిరిపోయే కలెక్షన్స్ వచ్చాయి. ఈ రోజుల్లో ఒక వారం సినిమా ఆడితేనే అద్భుతం అంటున్నారు. అలాంటి రెండు వారాల తర్వాత కూడా క్రాక్ మంచి వసూళ్లు తీసుకొస్తుంది.

దానికితోడు కరోనా వైరస్ ఉన్నా కూడా ప్రేక్షకులు దాని గురించి మర్చిపోయారు. థియేటర్ వైపు అడుగులు వేస్తున్నారు. ఈ విషయంలో క్రాక్ సినిమా పాత్ర కూడా చాలానే ఉంది. విడుదలైన 17వ రోజు తెలుగు రాష్ట్రాల్లో ఏకంగా 1.25 కోట్ల షేర్ తీసుకువచ్చింది ఈ సినిమా. సెలవు రోజు కావడంతో ప్రేక్షకులు థియేటర్ల వైపు కదిలారు. దాంతో సినిమాకు కలెక్షన్ల కుంభవృష్టి కురిసింది. ఇప్పటికే తెలుగు రాష్ట్రాల్లో 34 కోట్ల షేర్ అందుకుంది క్రాక్. కేవలం 16 కోట్ల బిజినెస్ మాత్రమే చేసిన ఈ సినిమా ఇప్పటికే 20 కోట్ల లాభాలు అందుకుంది.

పైగా డిజిటల్ రైట్స్ కూడా భారీగానే అమ్ముడయ్యాయి. ఈ సినిమాను జనవరి 29న ఆహాలో విడుదల చేయాలని అల్లు అరవింద్ వర్గం నిర్ణయించుకున్నారు. అయితే ఇప్పటికీ కలెక్షన్స్ బాగానే ఉండటంతో మరో వారం పోస్ట్ ఫోన్ చేయాలని విజ్ఞప్తి చేశారు. దీనిపై ఆహా యూనిట్ ఎలాంటి నిర్ణయం తీసుకుంది అనేది బయటికి రాలేదు. కానీ క్రాక్ వసూలు మాత్రం ఓ రేంజ్ లో వస్తున్నాయి. 17 రోజుల తర్వాత కూడా కోటి రూపాయలకు పైగా షేర్ తీసుకురావడం చిన్న విషయం కాదు. ఈ ఒక్క సాక్ష్యం చాలు థియేటర్లకు మళ్లీ మంచి రోజులు వచ్చాయి అని చెప్పడానికి.