ఆదివారం 29 మార్చి 2020
Cinema - Feb 24, 2020 , 00:16:25

రిలయన్స్‌ రిటైల్‌ హవా

రిలయన్స్‌ రిటైల్‌ హవా
  • వేగవంతమైన వృద్ధిని సాధిస్తున్న టాప్‌-50 సంస్థల్లో అగ్రస్థానం

న్యూఢిల్లీ, ఫిబ్రవరి 23: ముకేశ్‌ అంబానీకి చెందిన రిలయన్స్‌ రిటైల్‌ మరోమారు సత్తచాటింది. ప్రపంచవ్యాప్తంగా ఉన్న వేగవంతమైన వృద్ధిని నమోదు చేసుకుంటున్న   సంస్థల్లో రిలయన్స్‌ రిటైల్‌ అగ్రస్థానంలో దూసుకుపోయింది. 2013-18 ఆర్థిక సంవత్సరాల మధ్యకాలానికిగాను డెలాయిట్‌ గ్లోబల్‌ పవర్‌ ఆఫ్‌ రిటైలింగ్‌ 2020 ఇండెక్స్‌ పేరుతో విడుదల చేసిన జాబితాలో రిలయన్స్‌ రిటైల్‌ తొలిసారిగా టాప్‌-50లోకి చేరుకున్నది. 2017-18 ఆర్థిక సంవత్సరానికిగాను 250 సంస్థల వార్షిక నివేదిక ఆధారంగా ఈ జాబితాను రూపొందించింది. దేశీయ రిటైల్‌ దిగ్గజమైన రిలయన్స్‌ రిటైల్‌ గతేడాదికిగాను 56వ స్థానంలో నిలిచింది. అంతక్రితం ఏడాది 94వ స్థానంలో ఉంది. 2016-17లో ఆరో స్థానంలో ఉన్న రిలయన్స్‌ రిటైల్‌..ఆ తర్వాతి ఏడాదికిగాను తొలిస్థానానికి ఎగబాకింది. 55.8 శాతం సగటు వృద్ధితో ఈ స్థానం దక్కించుకున్నదని డెలాయిట్‌ నివేదిక వెల్లడించింది. ఈ జాబితాలో చోటుదక్కించుకున్న దేశీయ సంస్థ రిలయన్స్‌ రిటైల్‌ కావడం విశేషం. ఈ జాబితాలో చోటు దక్కించుకున్న సంస్థల్లో సగాని కంటే పైగా జపాన్‌కు చెందినవి కాగా, మూడోవంతు చైనా, హాంకాంగ్‌లకు చెందినవి. 2017-18 ఏడాదికిగాను రిలయన్స్‌ రిటైల్‌ 18.5 బిలియన్‌ డాలర్ల ఆదాయాన్ని ఆర్జించింది. అంతక్రితం ఏడాదితో పోలిస్తే 88.4 శాతం వృద్ధిని నమోదు చేసుకున్నది. 

వెయ్యికిపైగా స్టోర్లు

అటు వ్యాపార విస్తరణలో ఆర్‌-రిటైల్‌ దూసుకుపోతున్నది. దేశవ్యాప్తంగా 10 వేలకు పైగా స్టోర్లను ఏర్పాటు చేసిన తొలి సంస్థ కూడా ఆర్‌-రిటైల్‌ కావడం విశేషం. రిటైల్‌తోపాటు ఈ-కామర్స్‌ వ్యాపారంపై కూడా దృష్టి సారించడానికి Ajio.com వెబ్‌సైట్‌ను ఏర్పాటు చేయడం సంస్థకు కలిసొచ్చింది. ఈ వెబ్‌సైట్‌ ద్వారా స్మార్ట్‌ఫోన్లు, కన్జ్యూమర్‌ ఎలక్ట్రానిక్స్‌ విభాగం మరింత బలోపేతం కావడం, బ్రిటన్‌కు చెందిన బొమ్మల రిటైలర్‌ హ్యామ్‌లేస్‌ను కొనుగోలు చేయడం కూడా మెరుగైన వృద్ధికి దోహదం చేసిందని నివేదిక వెల్లడించింది. కాగా, ఈ జాబితాలో వాల్‌-మార్ట్‌ స్టోర్స్‌ తొలిస్థానంలో నిలువగా, ఆ తర్వాతి స్థానంలో క్యాస్ట్‌కో హోల్‌సేల్‌ కార్ప్‌లు ఉన్నాయి. ఈ-కామర్స్‌ దిగ్గజం అమెజాన్‌ మూడో స్థానానికి ఎగబాకింది. పలు విదేశాల్లో వ్యాపారం నిర్వహిస్తున్న క్రోగర్‌(అమెరికా) మాత్రమే టాప్‌-10లోకి వచ్చింది. ఈ సందర్భంగా డెలాయిట్‌ ఇండియా ప్రతినిధి మాట్లాడుతూ...దేశవ్యాప్తంగా దీర్ఘకాలికంగా మందకొడి పరిస్థితులు నెలకొన్నప్పటికీ రిటైల్‌ రంగం మాత్రం పుంజుకున్నదని, ముఖ్యంగా భారత్‌తోపాటు ప్రపంచవ్యాప్తంగా అంచనాలకుమించి దూసుకుపోతున్నదని, వచ్చే ఏడాదికిగాను ప్రవేశపెట్టిన సార్వత్రిక బడ్జెట్‌లో పలు కీలక నిర్ణయాలు తీసుకోవడం కూడా కలిసిరానున్నదన్నారు.  విదేశీ ప్రత్యక్ష పెట్టుబడులు నిబంధనలు సడలించడం, విదేశీ పోర్ట్‌ఫోలియో ఇన్వెస్టర్లపై విధిస్తున్న సర్చార్జిని ఎత్తివేయడం, పలు పారిశ్రామిక రంగాలకు ప్రత్యేక ప్యాకేజీ ప్రకటించడం వంటి కీలక నిర్ణయాలు కేంద్రం తీసుకున్నది. 


logo